हर्षवर्धन कदमची दैदीप्यमान कामगिरी; ३१६ किलो वजन उचलून पटकावले सुवर्णपदक
कुरुंदवाड | प्रतिनिधी
दिवसभर वृत्तपत्र विक्री करून कुटुंबाचा उदरनिर्वाह करणारे वडील, मुलाच्या उज्ज्वल भवितव्यासाठी कष्टांची पराकाष्ठा करणारे आई-वडील आणि त्यांच्या कष्टांना यशाची सुवर्णझळाळी देणारा मुलगा! पेपर विक्रेते दिगंबर बापूसो कदम यांचा मुलगा हर्षवर्धन कदम याने वेटलिफ्टिंग स्पर्धेत तब्बल ३१६ किलो वजन उचलत सुवर्णपदक पटकावले. वडिलांच्या कष्टाचे आणि कुटुंबाच्या त्यागाचे चीज करणाऱ्या या यशामुळे कदम कुटुंबाचा आनंद गगनात मावेनासा झाला असून, हर्षवर्धनच्या कामगिरीचे सर्वत्र कौतुक होत आहे.
शिरोळ तालुक्यातील कुरुंदवाड येथील सहकारभूषण डॉ. एस. के. पाटील महाविद्यालयाचा विद्यार्थी असलेल्या हर्षवर्धनने गुजरात येथे झालेल्या वेस्ट झोन इंटर युनिव्हर्सिटी वेटलिफ्टिंग स्पर्धा २०२६-२७ मध्ये आपल्या ताकदीची आणि जिद्दीची चमक दाखवली. स्नॅच प्रकारात १४५ किलो, तर क्लीन अँड जर्क प्रकारात १७१ किलो असे एकूण ३१६ किलो वजन उचलून त्याने सुवर्णपदकावर आपले नाव कोरले. त्याच्या या यशामुळे महाविद्यालयासह कुरुंदवाडच्या शिरपेचात मानाचा तुरा रोवला गेला आहे.
हर्षवर्धनच्या या यशामागे त्याची कठोर मेहनत, सरावातील सातत्य आणि प्रशिक्षकांचे मार्गदर्शन आहे. येथील हर्क्युलस जिममध्ये प्रदीप पाटील आणि अविनाश टारे यांनी त्याला प्रशिक्षण देऊन घडवले. शिस्त, जिद्द आणि अथक परिश्रमाच्या जोरावर त्याने हे यश संपादन केले.
विशेष म्हणजे, हर्षवर्धनचे वडील दिगंबर बापूसो कदम हे वृत्तपत्र विक्रीचा व्यवसाय करून कुटुंबाचा उदरनिर्वाह करतात. रोजच्या कष्टातून मुलाच्या स्वप्नांना बळ देणाऱ्या वडिलांच्या मेहनतीचे चीज हर्षवर्धनने सुवर्णपदकाच्या रूपाने केले आहे. एका कष्टकरी वृत्तपत्र विक्रेत्याच्या घरातून आंतरविद्यापीठीय स्पर्धेतील सुवर्णपदकापर्यंत पोहोचलेला त्याचा प्रवास अनेक युवकांसाठी प्रेरणादायी ठरत आहे.
हर्षवर्धनच्या या यशात आई-वडील आणि आजी-आजोबा यांचे प्रोत्साहन मोलाचे ठरले. तसेच महाविद्यालयाचे प्रा. सुनील चव्हाण, नगरसेवक विजय पाटील आणि योगिनी पाटील यांचेही सहकार्य लाभले.
हर्षवर्धनच्या या सुवर्णकामगिरीमुळे कष्ट, जिद्द आणि योग्य मार्गदर्शनाच्या बळावर प्रतिकूल परिस्थितीवर मात करून यशाचे शिखर गाठता येते, हे पुन्हा एकदा सिद्ध झाले आहे.








