भीषण आगीत सुमारे ५० लाखांचे नुकसान; अग्निशमन दलाचे आग विझवण्यासाठी शर्थीचे प्रयत्न
रत्नागिरी | प्रतिनिधी
कोकणात अलीकडच्या काळात आगीच्या घटनांमध्ये वाढ होत असल्याचे चित्र दिसत आहे. ऐन दिवाळीत भाऊबीजेच्या दिवशी पहाटे रत्नागिरी शहरातील श्री महालक्ष्मी मिनी मॉलला लागलेल्या आगीत कोट्यवधी रुपयांचे नुकसान झाले होते. ही घटना ताजी असतानाच आता रत्नागिरीतील मिरजोळे एमआयडीसी परिसरात टेक्नो सर्व्हिसेस कंपनीला भीषण आग लागून संपूर्ण कंपनी जळून खाक झाली आहे. या दुर्घटनेत सुमारे ५० लाख रुपयांचे नुकसान झाल्याचा प्राथमिक अंदाज आहे.
मिळालेल्या माहितीनुसार, शनिवार, दि. १४ नोव्हेंबर रोजी रात्री नऊ ते साडेनऊच्या सुमारास टेक्नो सर्व्हिसेस कंपनीला आग लागल्याचे निदर्शनास आले. आग लागल्याचे समजताच परिसरातील नागरिक आणि उपस्थितांनी आग विझवण्यासाठी प्रयत्न सुरू केले.
कंपनीला आग लागल्याची माहिती मिळताच कंपनीचे मालक मनीष आपटे तातडीने घटनास्थळी दाखल झाले. दरम्यान, एमआयडीसीच्या अग्निशमन दलाचे बंबही घटनास्थळी पोहोचले. अग्निशमन दलाच्या जवानांनी आग आटोक्यात आणण्यासाठी शर्थीचे प्रयत्न केले.
मात्र, आगीची तीव्रता अधिक असल्याने कंपनीतील साहित्य आणि संपूर्ण कंपनी जळून भस्मसात झाली. या आगीत मोठ्या प्रमाणात आर्थिक नुकसान झाले असून, प्राथमिक अंदाजानुसार सुमारे ५० लाख रुपयांचे नुकसान झाल्याचे सांगण्यात येत आहे.
दिवाळीच्या काळात रत्नागिरी परिसरात घडलेल्या या सलग आगीच्या घटनांमुळे औद्योगिक क्षेत्रातील अग्निसुरक्षेचा प्रश्न पुन्हा ऐरणीवर आला आहे. आगीचे नेमके कारण आणि नुकसानीचा अंतिम आकडा अधिकृत तपासानंतर स्पष्ट होणार आहे.
