आमदार किशोर भाऊ दराडे यांच्या मार्गदर्शनाखाली येवला तालुका शिवसेनेचा पुढाकार; आदिवासी बांधवांशी साधला आपुलकीचा संवाद
येवला | प्रतिनिधी
आदिवासी स्वातंत्र्यलढ्याचे महानायक आणि क्रांतिकारक जननायक भगवान बिरसा मुंडा यांच्या जयंतीनिमित्त येवला तालुका शिवसेनेच्या वतीने मौजे गुजरखेडे येथे सामाजिक बांधिलकी जपत विशेष उपक्रम राबविण्यात आला. या उपक्रमांतर्गत परिसरातील १०० आदिवासी कुटुंबांना घरगुती किराणा साहित्याचे वाटप करण्यात आले.
कार्यक्रमाची सुरुवात भगवान बिरसा मुंडा यांच्या प्रतिमेस पुष्पहार अर्पण करून अभिवादनाने करण्यात आली. यावेळी आदिवासी बांधवांशी प्रत्यक्ष संवाद साधत त्यांच्या अडचणी, समस्या आणि विविध प्रश्न जाणून घेण्यात आले. आदिवासी समाजाच्या सुख-दुःखात सहभागी होऊन त्यांना आधार देण्याच्या उद्देशाने या कार्यक्रमाचे आयोजन करण्यात आले होते.
आमदार किशोर भाऊ दराडे यांच्या मार्गदर्शनाखाली राबविण्यात आलेल्या या उपक्रमात येवला तालुका शिवसेनेचे तालुकाप्रमुख पांडुरंग शेळके पाटील यांच्या हस्ते १०० आदिवासी कुटुंबांना किराणा साहित्याचे वाटप करण्यात आले. या सामाजिक उपक्रमातून आदिवासी बांधवांप्रती आपुलकी आणि सामाजिक बांधिलकी जपण्याचा प्रयत्न करण्यात आला.
या प्रसंगी शिवसेना समन्वयक रावसाहेब पारखे, तंटामुक्ती अध्यक्ष विजय चव्हाण, पोलीस पाटील संजय बच्छाव, कर्णा चव्हाण, नारायण गुजर, धर्मा चव्हाण, बाळू चव्हाण, महेंद्र साळुंखे यांच्यासह मान्यवर आणि ग्रामस्थ मोठ्या संख्येने उपस्थित होते.










