शहादा,दि.१०(प्रतिनिधी)
मंदाणे ता. शहादा येथे शासकीय योजनांचा लाभ सर्वसामान्यांपर्यंत प्रभावीपणे पोहोचवण्यासाठी आणि व्यापक जनजागृती करण्याच्या उद्देशाने छत्रपती शिवाजी महाराज समाधान शिबिर अभियान टप्पा एक’चे आयोजन शुक्रवारी दि.१० एप्रिल रोजी मंदाणे मंडळ कार्यालयात करण्यात आले. या शिबिरास परिसरातील लाभार्थ्यांनी उत्स्फूर्त प्रतिसाद दिला.
शहाद्याचे तहसीलदार संभाजी पाटील यांच्या अध्यक्षतेखाली हे शिबिर संपन्न झाले. कार्यक्रमाच्या प्रारंभी मान्यवरांच्या हस्ते प्रतिमा पूजन व दीपप्रज्वलन करण्यात आले. त्यानंतर उपस्थित मान्यवर व विभागीय अधिकाऱ्यांचे स्वागत ग्राम महसूल अधिकारी लक्ष्मण कोळी व महेश ठाकरे यांनी केले.या शिबिरात विविध शासकीय विभागांनी स्टॉल्स लावून नागरिकांना मार्गदर्शन केले.ग्राम महसूल अधिकारी लक्ष्मण कोळी यांनी अद्ययावत नियम, ७/१२ उतारा व विविध दाखल्यांबाबत माहिती दिली.पुरवठा विभागाचे दिलीप पाडवी यांनी योजनांची माहिती दिली, तर कुमारी कीर्ती बेंडकुळे यांनी रेशन कार्ड प्रक्रियेबाबत मार्गदर्शन केले.संजय गांधी निराधार योजनेबाबत शिरीष परदेशी यांनी मार्गदर्शन करून पात्र लाभार्थ्यांना प्रत्यक्ष मंजुरी आदेशांचे वाटप केले.
कृषी व आरोग्य विभागाच्या वतीने शेतकऱ्यांना पीक विमा, अनुदान आणि आरोग्य योजनांबाबत सविस्तर माहिती देण्यात आली. तसेच लाडकी बहीण योजनेच्या अर्ज प्रक्रियेबाबत महिलांना मार्गदर्शन करण्यात आले.मंडळ अधिकारी शशिधर सावळे यांनी कार्यक्रमाचे प्रास्ताविक व उत्कृष्ट नियोजन केले होते. कार्यक्रमाची रूपरेषा शिरीषचंद्र परदेशी यांनी आखली होती.
या प्रसंगी उपसरपंच शरद साळुंखे, धरमसिंग पावरा, माजी जि.प. सदस्य दीपक भिल, मंदाणे पोलीस पाटील, विविध विभागांचे अधिकारी, पत्रकार आणि मोठ्या संख्येने लोकप्रतिनिधी उपस्थित होते.कार्यक्रमाच्या यशस्वीतेसाठी महेश ठाकरे, रेहमल पावरा, आशिष नरवाडे, श्रीमती जयश्री जटारे, चेतन शेळके,रतनसिंग राजपूत व महसूल सेवकांनी परिश्रम घेतले. कार्यक्रमाचे सूत्रसंचालन व आभार प्रदर्शन लक्ष्मण कोळी यांनी केले.
चौकट -:
“शासकीय योजनांना गती देण्यासाठी आणि प्रशासनाला थेट जनतेच्या दारापर्यंत नेण्यासाठी हे अभियान एक महत्त्वपूर्ण पाऊल ठरले आहे.”
संभाजी पाटील (तहसीलदार, शहादा)
