नेवासा : प्रतिनिधी
नेवासा तालुक्यात पंचायत समिती निवडणुकांची चाहूल लागताच राजकीय हालचालींना वेग आला आहे. या पार्श्वभूमीवर स्थानिक राजकारणात सक्रिय असलेले आण्णा वाघमारे यांनी पंचायत समिती निवडणुकीच्या रिंगणात उतरण्याची शक्यता वर्तवली जात आहे.
गेल्या काही दिवसांपासून विविध गावांमध्ये बैठका, कार्यकर्त्यांशी संवाद आणि जनसंपर्क वाढवताना वाघमारे दिसत असून त्यांनी मतदारांशी थेट संपर्क साधण्यावर भर दिला आहे. यामुळे त्यांच्या उमेदवारीबाबत चर्चांना उधाण आले आहे..
स्थानिक पातळीवर विकासकामे, पाणीपुरवठा, रस्ते आणि शेतकरी प्रश्न यावर लक्ष केंद्रीत करून निवडणूक लढवण्याचा त्यांचा विचार असल्याचे त्यांच्या समर्थकांकडून सांगितले जात आहे. तसेच पंचायत समितीत प्रभावी नेतृत्व देण्याचा संदेशही ते मतदारांपर्यंत पोहोचवत आहेत.
दरम्यान, अधिकृत उमेदवारीबाबत अद्याप स्पष्ट घोषणा करण्यात आलेली नसली तरी येत्या काही दिवसांत वाघमारे यांची भूमिका स्पष्ट होण्याची शक्यता आहे. त्यांच्या संभाव्य उमेदवारीमुळे नेवासा पंचायत समिती निवडणुकीत चुरस वाढण्याची चिन्हे दिसत आहेत.
