क्रांतीचा साक्षीदार : एकपात्री नाट्यप्रयोगाने बाबासाहेबांच्या विचारांना उजाळा
प्रतिनिधी अहमद अन्सारी पाथरी परभणी
परभणी, दि. 11/04/2026 भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त सामाजिक समता सप्ताहाच्या अनुषंगाने आज परभणी येथील श्री शिवाजी महाविद्यालयात “क्रांतीचा साक्षीदार” या एकपात्री नाट्यप्रयोगाचे आयोजन करण्यात आले होते. या नाटकास प्रेक्षकांचा उस्फुर्त प्रतिसाद लाभला.
शनिवारी सकाळी ११.०० वाजता महाविद्यालयाच्या सभागृहात पार पडलेल्या या कार्यक्रमात नाटककार, दिग्दर्शक व सादरकर्ते रुपेश निकाळजे (बीड) यांनी आपल्या प्रभावी सादरीकरणातून बाबासाहेबांच्या सामाजिक चळवळीचा इतिहास जिवंत केला.
कार्यक्रमास उपस्थित जिल्हाधिकारी संजयसिंह चव्हाण यांनी महात्मा जोतीराव फुले यांच्या द्विशताब्दी जन्ममहोत्सवानिमित्त विद्यार्थ्यांना शिक्षणाचे महत्त्व पटवून दिले. त्यांनी महात्मा फुले यांनी घालून दिलेल्या आदर्शांचा अंगीकार करण्याचे आवाहन केले. तसेच बाबासाहेबांच्या जयंतीनिमित्त त्यांच्या विचारांचे आचरण करणे हीच खरी आदरांजली ठरेल, असे मत व्यक्त केले.
यावेळी शासकीय वसतिगृहात राहून शिक्षण पूर्ण करून शासकीय सेवेत रुजू झालेल्या विद्यार्थ्यांचा सत्कार करण्यात आला. तसेच पात्र विद्यार्थ्यांना जात वैधता प्रमाणपत्रांचे वितरण आणि अनुसूचित जातीच्या बचत गटांना मिनी ट्रॅक्टर वाटप आदेशही प्रदान करण्यात आले.
कार्यक्रमास समाज कल्याण विभागाचे सहाय्यक आयुक्त राजू एडके, विशेष अधिकारी अनिल अंजनिकर, प्राचार्य बी. यु. जाधव, उपप्राचार्य एन. एन. राऊत, सह्याद्री फाउंडेशनचे सुधीर साळवे, अॅड. पवनकुमार शिंदे यांच्यासह मान्यवर उपस्थित होते.
कार्यक्रमाच्या यशस्वीतेसाठी समाज कल्याण विभागाच्या सर्व अधिकारी व कर्मचाऱ्यांनी परिश्रम घेतले.
