महाराष्ट्र इन्स्टिट्यूट ऑफ फिजिओथेरपी महाविद्यालयाची राज्यस्तरावर चमक
लातूर, दि. १६ :
महाराष्ट्र इन्स्टिट्यूट ऑफ फिजिओथेरपी महाविद्यालयाने राज्यस्तरीय ‘स्पंदन ललित कला २०२६’ युवक महोत्सवात उल्लेखनीय यश संपादन करत लघुपट स्पर्धेत प्रथम क्रमांक पटकावला आहे. विद्यार्थ्यांनी सादर केलेल्या ‘निदान’ या लघुपटाने प्रभावी कथा, उत्कृष्ट अभिनय आणि समाजमनाला भिडणाऱ्या आशयाच्या जोरावर परीक्षकांसह प्रेक्षकांचीही मने जिंकली.
पुणे येथील ढोले पाटील फिजिओथेरपी महाविद्यालयात आयोजित करण्यात आलेल्या या राज्यस्तरीय महोत्सवात राज्यभरातील विविध महाविद्यालयांनी सहभाग घेतला होता. विविध कला प्रकारांमध्ये स्पर्धा पार पडल्या. अत्यंत चुरशीच्या वातावरणात महाराष्ट्र इन्स्टिट्यूट ऑफ फिजिओथेरपी महाविद्यालयाच्या विद्यार्थ्यांनी ‘निदान’ या लघुपटातून ‘षड्रिपू’ या संकल्पनेवर आधारित प्रभावी मांडणी करत सर्वांचे लक्ष वेधले.
काम, क्रोध, लोभ, मोह, मद आणि मत्सर या मानवी जीवनातील षड्रिपूंचा व्यक्तीच्या आयुष्यावर होणारा परिणाम, मानसिक संघर्ष आणि त्यातून निर्माण होणाऱ्या सामाजिक परिस्थितीचे वास्तववादी चित्रण या लघुपटात करण्यात आले होते. आधुनिक जीवनशैलीतील वाढत्या मानसिक ताणतणावांवर भाष्य करणारा हा लघुपट विचारप्रवर्तक ठरला.
या लघुपटाचे दिग्दर्शन व पटकथा लेखन अंतिम वर्षातील विद्यार्थी आफताब मशायक यांनी केले. प्रियंका महाजन आणि अंजली थोंबाळ यांनी संवादलेखनाची जबाबदारी सांभाळली. धम्मसंकेत सपकाळ आणि संकेत बनसोडे यांनी छायाचित्रण केले, तर अबरार खान यांनी संपादनाची धुरा सांभाळली.
लघुपटातील अभिनय, पार्श्वसंगीत, तांत्रिक हाताळणी आणि प्रभावी सादरीकरणाचे परीक्षकांनी विशेष कौतुक केले. या लघुपटात आफताब मशायक, साक्षी साखरे, सुप्रिया कुंभार, अंजली थोंबाळ, आदिती गंगावणे, अथर्व अनावडे, गणेश वाघमारे, पियुष बोरसे आणि प्राजक्ता शेप यांनी भूमिका साकारल्या.
या स्पर्धेसाठी विद्यार्थ्यांना डॉ. आनंद रेड्डी आणि डॉ. श्रुती ताडमारे यांचे मार्गदर्शन लाभले.
या यशाबद्दल विद्यार्थ्यांचा कार्यकारी संचालक डॉ. हनुमंत कराड यांच्या हस्ते सत्कार करण्यात आला. यावेळी प्राचार्य डॉ. सुभाष खत्री, डॉ. श्रुती ताडमारे तसेच शिक्षकवृंद उपस्थित होते. विद्यार्थ्यांनी शैक्षणिक क्षेत्रासोबत कला आणि सांस्कृतिक क्षेत्रातही उल्लेखनीय कामगिरी केल्याबद्दल त्यांचे सर्व स्तरातून अभिनंदन होत आहे.
