पुणे प्रतिनिधी –
शिरूर, जून महिन्यात होणाऱ्या विधान परिषदेच्या निवडणुकीच्या पार्श्वभूमीवर पुणे विभागातील राजकीय वातावरण चांगलेच तापले असून विविध इच्छुकांच्या नावांची चर्चा राजकीय वर्तुळात रंगू लागली आहे. याच पार्श्वभूमीवर शिरूर नगरपरिषदेचे नगरसेवक अभिजीत गणेश पाचर्णे हे विधान परिषदेची निवडणूक लढविण्यास इच्छुक असल्याची चर्चा सध्या शिरूरच्या राजकीय वर्तुळात जोर धरू लागली आहे.
पुणे विभागातून होणाऱ्या या निवडणुकीत नगरपरिषद व नगरपंचायतींचे नगरसेवक मतदान करणार असल्याने या निवडणुकीला विशेष महत्त्व प्राप्त झाले आहे. महायुतीमध्ये ही जागा कोणत्या पक्षाकडे जाणार याबाबत अद्याप स्पष्टता नसली तरी राष्ट्रवादी काँग्रेस आणि भाजपमध्ये रस्सीखेच सुरू असल्याचे बोलले जात आहे. दोन्ही पक्षांच्या नगरसेवकांची संख्या जवळपास समान असल्याने ही निवडणूक अत्यंत चुरशीची ठरणार आहे.
या पार्श्वभूमीवर अनेक इच्छुकांनी आपापली तयारी सुरू केली असून राष्ट्रवादी काँग्रेसकडून अभिजीत गणेश पाचर्णे यांच्या नावाची विशेष चर्चा सुरू असल्याचे समजते. त्यांनीही ही निवडणूक लढविण्याची इच्छा व्यक्त केल्याची माहिती राजकीय वर्तुळातून पुढे येत आहे. येत्या काही दिवसांत या चर्चांना अधिकृत स्वरूप मिळते का, याकडे सर्वांचे लक्ष लागले आहे.
अभिजीत पाचर्णे यांनी २०१६ मध्ये शिरूर नगरपरिषदेच्या निवडणुकीत विजय मिळवत नगरसेवक म्हणून राजकीय प्रवास सुरू केला होता. त्या काळात त्यांनी बांधकाम सभापती म्हणूनही जबाबदारी सांभाळत विविध विकासकामांमध्ये सक्रिय भूमिका बजावली होती. सध्या २०२५ च्या कार्यकाळात ते स्वीकृत नगरसेवक म्हणून कार्यरत आहेत.
विशेष म्हणजे त्यांच्या पत्नी ऐश्वर्याताई अभिजीत पाचर्णे या सध्या शिरूर नगरपरिषदेच्या नगराध्यक्षा म्हणून कार्यरत असून पाचर्णे कुटुंबाचे शिरूरच्या राजकारणातील वाढते वजन चर्चेचा विषय ठरत आहे.
विधानपरिषदेच्या निवडणुकीच्या निमित्ताने शिरूरमधून पुन्हा एकदा युवा नेतृत्व पुढे येत असल्याचे चित्र दिसत असून अभिजीत पाचर्णे यांच्या संभाव्य उमेदवारीकडे आता राजकीय विश्लेषक आणि कार्यकर्त्यांचे लक्ष लागले आहे.
