प्रतिनिधी
25 मे 2026 | भूम
भारतीय जनगणना २०२७ अंतर्गत प्रगणक म्हणून नियुक्त करण्यात आलेल्या शिक्षकाने जनगणनेच्या कामाकडे दुर्लक्ष करून वारंवार गैरहजर राहिल्याप्रकरणी भूम पोलिस ठाण्यात गुन्हा दाखल करण्यात आला आहे. गुरुदेवदत्त हायस्कूल येथील शिक्षक आबासाहेब शंकरराव ढगे यांच्याविरुद्ध भारतीय जनगणना अधिनियम १९४८ तसेच बीएनएस २०२३ अंतर्गत कारवाई करण्यात आली आहे.
याबाबत नायब तहसीलदार तथा जनगणना अधिकारी (शहर) प्रविण दिलीप जाधव यांनी फिर्याद दिली. फिर्यादीनुसार, ढगे यांची प्रगणक म्हणून नियुक्ती करण्यात आली होती. मात्र आदेशित ठिकाणी जनगणनेचे काम न करता ते वारंवार गैरहजर राहिल्याचे प्रशासनाच्या निदर्शनास आले.
दि. १६ मे २०२६ रोजी सकाळी १० वाजल्यापासून ते दि. २३ मे २०२६ रोजी सायंकाळी ६ वाजेपर्यंत त्यांनी जनगणनेच्या कामात सहभाग घेतला नसल्याने राष्ट्रीय महत्त्वाच्या कामात अडथळा निर्माण झाल्याचा ठपका ठेवण्यात आला आहे.
भारतीय जनगणना अधिनियम १९४८ च्या कलम ११ (१) (अअ) नुसार जनगणनेच्या कामावर हजर राहण्यास नकार देणे अथवा आदेशाचे पालन न करणे हा गंभीर गुन्हा मानला जातो. या प्रकरणी पोलीस ठाणे भूम येथे गु.र.नं. ३२३/२०२६ प्रमाणे गुन्हा नोंद करण्यात आला असून पुढील तपास पोलीस कर्मचारी लोंढे यांच्या मार्गदर्शनाखाली सुरू आहे.
