शहादा | प्रतिनिधी
शहादा शहरातील कुकडेल परिसराचा झपाट्याने झालेला विस्तार आणि वाढती लोकसंख्या लक्षात घेता या भागात स्वतंत्र पोलीस चौकी स्थापन करण्यात यावी, अशी मागणी शहादा नगरपालिकेच्या उपनगराध्यक्ष सौ. माधवीताई मकरंद पाटील यांनी केली आहे.
या संदर्भात त्यांनी नंदुरबार जिल्ह्याचे पोलीस अधीक्षक तसेच शहादा पोलीस निरीक्षक यांना सविस्तर निवेदन दिले आहे.
निवेदनात नमूद करण्यात आले आहे की, कुकडेल परिसरात शिवाजीनगर, श्रमिक कॉलनी, सिद्धार्थनगर, सालदारनगर, आझाद चौक, भवानी चौक, स्वीपर कॉलनी यांसह अनेक वसाहतींचा समावेश असून येथे मोठ्या प्रमाणात मध्यमवर्गीय व कामगार वर्गाची लोकसंख्या वास्तव्यास आहे.
या परिसरात कोणतीही अनुचित घटना घडल्यास नागरिकांना शहादा-दोंडाईचा मार्गावरील मुख्य पोलीस ठाण्यापर्यंत जावे लागते. हे अंतर जास्त असल्याने आपत्कालीन परिस्थितीत पोलिस मदत वेळेवर पोहोचण्यात अडचणी निर्माण होतात, असेही निवेदनात म्हटले आहे.
महिला, लहान मुले आणि ज्येष्ठ नागरिकांच्या सुरक्षेच्या दृष्टीने या भागात २४ तास कार्यरत असलेली पोलीस चौकी आवश्यक असल्याचे त्यांनी स्पष्ट केले आहे.
कुकडेल परिसरातील एमएसईबी कार्यालय परिसर किंवा आझाद चौकातील जागा ही चौकीसाठी योग्य असल्याचेही त्यांनी सुचवले आहे.
या मागणीमुळे परिसरातील नागरिकांच्या सुरक्षिततेचा प्रश्न पुन्हा ऐरणीवर आला असून प्रशासन काय निर्णय घेते याकडे सर्वांचे लक्ष लागले आहे.
