कळमनुरी | प्रतिनिधी :
आखाडा बाळापूर पोलीस ठाण्यात कार्यरत असलेले सफाई कर्मचारी गौतम पडघणे हे महामार्गावर दुचाकी घसरून झालेल्या अपघातात गंभीर जखमी झाले. या प्रसंगी पोलिसांनी दाखविलेल्या तत्परतेमुळे आणि माणुसकीमुळे त्यांना वेळेत उपचार मिळून मोठा दिलासा मिळाला.
मिळालेल्या माहितीनुसार, गौतम पडघणे हे कळमनुरीजवळील रस्त्यावर दुचाकी घसरल्याने जखमी झाले होते. त्याचवेळी हिंगोलीकडे जात असलेले शोएब गिरगावकर यांनी त्यांना रस्त्याच्या कडेला पडलेल्या अवस्थेत पाहिले. त्यांनी तात्काळ वाहन थांबवून जखमी पडघणे यांना सुरक्षित ठिकाणी नेले, पाणी दिले आणि मदतीसाठी प्रयत्न सुरू केले.
घटनेची माहिती मिळताच येळेगाव तुकाराम येथील बीट जमादार राजेश घोंगडे आणि पोलीस कर्मचारी सागर वाढोणकर यांनी तातडीने घटनास्थळी धाव घेतली. त्यांनी जखमी गौतम पडघणे यांना हिंगोली येथील खासगी रुग्णालयात दाखल करून उपचाराची व्यवस्था केली.
विशेष म्हणजे, बीट जमादार राजेश घोंगडे यांनी स्वखर्चातून जखमीच्या औषधोपचारासाठी मदत करून माणुसकीचे दर्शन घडविले. त्यांच्या या संवेदनशील कृतीचे नागरिकांसह पोलीस विभागातही कौतुक होत आहे.
वेळेवर मदत मिळाल्यामुळे जखमी सफाई कर्मचाऱ्याला उपचार मिळाले असून, पोलिसांच्या या मानवतावादी भूमिकेची सर्वत्र प्रशंसा केली जात आहे.
