भोकर (प्रतिनिधी)
राष्ट्रीय पल्स पोलिओ लसीकरण मोहिमेअंतर्गत रविवार, दि. २८ जून २०२६ रोजी बोरगाव येथील अंगणवाडी केंद्र क्रमांक १ मध्ये शून्य ते पाच वर्ष वयोगटातील बालकांसाठी पोलिओ लसीकरण मोहीम उत्साहात राबविण्यात आली.
ही मोहीम यशस्वी करण्यासाठी आरोग्य विभाग व बालविकास विभागाच्या कर्मचाऱ्यांनी विशेष परिश्रम घेतले. यामध्ये हत्ती रोग कर्मचारी चव्हाण आय. के. यांनी मोहिमेचे चोख नियोजन व तांत्रिक सहकार्य केले.
अंगणवाडी कार्यकर्त्या अनुसया सोमेवाड यांनी उपस्थित पालकांना पोलिओ डोसचे महत्त्व पटवून देत बालकांना लसीकरणासाठी प्रोत्साहित केले. तसेच आशा वर्कर निर्मला गायकवाड यांनी गावातील प्रत्येक घरातील पात्र बालकांपर्यंत माहिती पोहोचवून त्यांना केंद्रावर आणण्यासाठी मोलाची भूमिका बजावली.
या मोहिमेदरम्यान बालकांना पोलिओ प्रतिबंधक लसीचे दोन थेंब पाजून त्यांचे भविष्य सुरक्षित करण्यात आले. गावकऱ्यांनीही आपल्या बालकांना मोठ्या संख्येने केंद्रावर आणून मोहिमेला उत्स्फूर्त प्रतिसाद दिला.
परिसरातील आरोग्य जनजागृतीसाठी ही मोहीम अत्यंत यशस्वी ठरली असून, सर्व स्तरांतून संबंधित कर्मचाऱ्यांचे कौतुक होत आहे.
