शहादा | प्रतिनिधी
स्थानिक व्हॉलंटरी हायस्कूल, शहादा येथे आयोजित करण्यात आलेल्या इयत्ता सहावीच्या नवीन अभ्यासक्रमाच्या अंमलबजावणीसाठीच्या चार दिवसीय तालुकास्तरीय शिक्षक प्रशिक्षणाचा उत्साहात समारोप झाला. नवीन शैक्षणिक धोरण आणि बदलत्या अभ्यासक्रमाची प्रभावी अंमलबजावणी करण्याच्या उद्देशाने या प्रशिक्षणाचे आयोजन करण्यात आले होते.
तज्ज्ञ सुलभकांचे मार्गदर्शन
प्रशिक्षणादरम्यान विविध विषयांवरील तज्ज्ञ सुलभकांनी शिक्षकांना सविस्तर मार्गदर्शन केले. विजयसिंह ठाकूर आणि योगेश पाटील यांनी राज्य अभ्यासक्रम आराखडा – शालेय शिक्षण २०२४ तसेच समग्र प्रगती पुस्तक (HPC) याविषयी माहिती दिली.
भूषण सोनवणे, तनिश चौधरी आणि महेश चौधरी यांनी व्यावसायिक शिक्षण व भाषा शिक्षणातील बदल स्पष्ट केले. तर गणेश पाटील, निलेश पवार आणि आकाश पाटील यांनी विज्ञान, गणित, सामाजिक शास्त्र, कलाशिक्षण, शारीरिक शिक्षण तसेच हेल्थ अँड वेलनेस या विषयांवर मार्गदर्शन केले.
सुलभकांनी व्याख्यानांबरोबरच प्रात्यक्षिके, कृती, उदाहरणे आणि गटचर्चेद्वारे नवीन अभ्यासक्रमातील संकल्पना शिक्षकांना प्रभावीपणे समजावून सांगितल्या.
अधिकाऱ्यांची उपस्थिती
प्रशिक्षणाचे समन्वयक तथा आमोदा केंद्राचे केंद्रप्रमुख चाटे सर यांनी प्रशिक्षणाचे महत्त्व अधोरेखित करत शिक्षकांना अध्यापनाबाबत मार्गदर्शन केले. चव्हाण सर यांनी आपल्या प्रभावी शैलीत प्रशिक्षणात सहभागी शिक्षकांच्या विविध शंकांचे निरसन केले.
प्रशिक्षणाच्या समारोपप्रसंगी शहादा पंचायत समितीचे गटशिक्षणाधिकारी डी. डी. राजपूत आणि गट विस्तार अधिकारी तावडे यांनी प्रशिक्षण वर्गाला भेट देऊन मार्गदर्शन केले. यावेळी मान्यवरांसह प्रशिक्षण समन्वयक, चाटे सर, चव्हाण सर आणि सर्व सुलभकांचा डायरी, पेन आणि पुष्पगुच्छ देऊन सत्कार करण्यात आला.
‘नवीन संकल्पना वर्गात प्रभावीपणे राबवा’
यावेळी मार्गदर्शन करताना गटशिक्षणाधिकारी डी. डी. राजपूत म्हणाले, “प्रशिक्षणात शिकलेल्या नवीन संकल्पना केवळ कागदापुरत्या मर्यादित न ठेवता त्या प्रत्यक्ष वर्गात विद्यार्थ्यांपर्यंत प्रभावीपणे पोहोचविणे आवश्यक आहे. अध्ययन-अध्यापन प्रक्रिया अधिक कृतीयुक्त, आनंददायी आणि विद्यार्थीकेंद्रित करण्यासाठी शिक्षकांनी नवनवीन प्रयोग करावेत.”
कार्यक्रमाच्या शेवटच्या सत्रात विनोद सर यांनी सूत्रसंचालन केले व उपस्थितांचे आभार मानले. अध्यक्षांच्या परवानगीने चार दिवसीय प्रशिक्षणाची सांगता करण्यात आली.
या प्रशिक्षणामुळे तालुक्यातील इयत्ता सहावीच्या शिक्षकांना नवीन अभ्यासक्रम प्रभावीपणे राबविण्यास निश्चितच मोठी मदत होणार असल्याचा विश्वास उपस्थितांनी व्यक्त केला.
