बुलडाणा | प्रतिनिधी
शेगाव येथील लहुजी नगर परिसरातील तालुका क्रीडा संकुलासाठी हटविण्यात आलेल्या १९२ झोपडीधारकांच्या पुनर्वसनाच्या मागणीची जिल्हाधिकारी कार्यालयाने दखल घेतली असून, या प्रकरणी पुढील कार्यवाही करण्याचे निर्देश संबंधित अधिकाऱ्यांना देण्यात आले आहेत.
समाजसेवक जी. ओ. तायडे, सुनिता तायडे व इतर प्रतिनिधींनी जिल्हाधिकारी प्रवीण देवरे, उपजिल्हाधिकारी (महसूल) समाधान गायकवाड तसेच नगर विकास शाखेचे जिल्हा सहआयुक्त टी. आर. पेंडे यांची भेट घेऊन लहुजी नगरमधील गरीब, अनुसूचित जाती-जमाती, मजूर आणि आर्थिकदृष्ट्या दुर्बल कुटुंबांचे तातडीने पुनर्वसन करण्याची मागणी केली.
यावर जिल्हाधिकारी कार्यालयाने संबंधित प्रकरणाची दखल घेत मुख्याधिकारी, नगर परिषद शेगाव यांना नियमानुसार आवश्यक कार्यवाही करून अहवाल सादर करण्याचे निर्देश दिले आहेत.
मात्र, अद्याप प्रत्यक्ष पुनर्वसन किंवा पर्यायी जागा उपलब्ध करून देण्यात आलेली नसल्याने झोपडीधारकांमध्ये नाराजीचे वातावरण आहे.
झोपडीधारकांनी शासनाकडे “प्रथम पुनर्वसन – नंतर विकास” या तत्त्वानुसार सर्व पात्र १९२ कुटुंबांचे तातडीने पुनर्वसन करून पर्यायी जागा उपलब्ध करून द्यावी, अशी मागणी केली आहे.
पुनर्वसनाबाबत लवकर निर्णय न झाल्यास न्यायालयीन मार्गाचा अवलंब करण्यासह लोकशाही पद्धतीने आंदोलन अधिक तीव्र करण्यात येईल, असा इशाराही प्रतिनिधींनी दिला आहे.
