गेवराई | प्रतिनिधी :
जिल्ह्यात अवैध धंद्यांविरोधात सुरू असलेल्या विशेष मोहिमेअंतर्गत गेवराई पोलिसांनी जुगार अड्ड्यावर धाड टाकून मोठी कारवाई केली. या कारवाईत सहा जणांना ताब्यात घेण्यात आले असून रोख रक्कम, मोटारसायकली व जुगाराचे साहित्य असा सुमारे ४ लाख २५ हजार रुपयांचा मुद्देमाल जप्त करण्यात आला आहे.
पोलीस अधीक्षक नवनीत कांवत यांनी जिल्ह्यातील अवैध धंद्यांवर कठोर कारवाई करण्याचे आदेश दिल्यानंतर गेवराई पोलिसांनी विशेष पथकाची स्थापना केली. त्यानुसार दि. ६ जुलै २०२६ रोजी सायंकाळी सुमारे ६ वाजता अंतरवलीकडे जाणाऱ्या पांदण रस्त्यालगत देवपिंप्री शिवारातील गायरान जमिनीवरील गोठ्यात सुरू असलेल्या जुगार अड्ड्यावर अचानक छापा टाकण्यात आला.
पोलीस पथक घटनास्थळी पोहोचताच जुगार खेळत असलेल्या सहा जणांना ताब्यात घेण्यात आले. त्यांच्या ताब्यातून रोख रक्कम, मोटारसायकली तसेच जुगारासाठी वापरण्यात येणारे साहित्य जप्त करण्यात आले. जप्त करण्यात आलेल्या मुद्देमालाची एकूण किंमत ४ लाख २५ हजार रुपये असल्याची माहिती पोलिसांनी दिली.
या प्रकरणी गेवराई पोलीस ठाण्यात महाराष्ट्र जुगार प्रतिबंधक कायद्यान्वये गुन्हा दाखल करण्यात आला असून पुढील तपास पोलीस कर्मचारी सुंदर राठोड करीत आहेत.
ही कारवाई पोलीस अधीक्षक नवनीत कांवत, अपर पोलीस अधीक्षक समीर शेख आणि उपविभागीय पोलीस अधिकारी अनिल कटके यांच्या मार्गदर्शनाखाली पोलीस निरीक्षक किशोर पवार यांच्या नेतृत्वात पार पडली. कारवाईत पोलीस अधिकारी व कर्मचाऱ्यांनी सक्रिय सहभाग घेत अवैध जुगार व्यवसायावर प्रभावी आळा घालण्याचा प्रयत्न केला.
जिल्ह्यातील अवैध धंद्यांविरोधातील कारवाया पुढील काळातही अधिक तीव्र करण्यात येणार असल्याचे संकेत पोलिसांनी दिले आहेत.
