पुणे | प्रतिनिधी
आषाढी वारीच्या पावन पर्वात विदर्भातील श्री ज्ञानराज माऊली कृपा प्रासादिक दिंडीच्या रौप्य महोत्सवानिमित्त पुणे येथील महापालिका शाळा क्र. ८०, दत्तवाडी येथे ‘श्री ज्ञानेश्वर महाराज गौरवामृत’ ग्रंथ व वारकरी भजनी मालिकेचे प्रकाशन उत्साहपूर्ण वातावरणात पार पडले.
यावेळी दिंडीचे विणेकरी ह.भ.प. पांडुरंगजी महाराज जगधरे यांनी तयार केलेल्या वारकरी भजनी मालिकेचे तसेच दिंडीचे मार्गदर्शक ह.भ.प. पुंडलिकजी महाराज बोळवटकर लिखित ‘श्री ज्ञानेश्वर महाराज गौरवामृत’ या ग्रंथाचे मान्यवरांच्या हस्ते प्रकाशन करण्यात आले.
कार्यक्रमास प्रमुख पाहुणे म्हणून प्रकाशभाऊ चोरघे, गणेशभाऊ पवार, वारकरी जिजाबाई राऊत, ह.भ.प. पांडुरंगजी महाराज जगधरे तसेच ह.भ.प. पुंडलिकजी महाराज बोळवटकर उपस्थित होते.
यावेळी ह.भ.प. पुंडलिकजी महाराज बोळवटकर, ह.भ.प. पांडुरंगजी महाराज जगधरे, जिजाबाई राऊत, प्रकाशभाऊ चोरघे, मानकर महाराज तसेच पुणे येथे पोलीस सेवेत कार्यरत वर्षाताई महाजन यांनी वारकरी संप्रदायाची परंपरा, संत साहित्याचे महत्त्व आणि आध्यात्मिक मूल्ये यावर मार्गदर्शन केले.
कार्यक्रमाच्या यशस्वी आयोजनासाठी श्री ज्ञानराज माऊली कृपा प्रासादिक संस्थेचे सर्व पदाधिकारी, कार्यकारी मंडळी तसेच आजी-माजी विद्यार्थी यांनी मोलाचे सहकार्य केले. उपस्थित वारकरी भाविकांनी संत परंपरेचा वारसा जपण्याचा संकल्प व्यक्त करत या उपक्रमाचे स्वागत केले.
