जामखेड | प्रतिनिधी :
जिल्हा परिषद प्राथमिक शाळा, फक्राबाद येथे विद्यार्थ्यांमध्ये जैवविविधतेबाबत जनजागृती निर्माण करण्याच्या उद्देशाने जागतिक काजवा दिन उत्साहात साजरा करण्यात आला. या निमित्ताने विद्यार्थ्यांना काजव्यांचे पर्यावरणातील महत्त्व, त्यांचे जीवनचक्र, अधिवास आणि जैवविविधता संवर्धनातील भूमिका याबाबत सविस्तर माहिती देण्यात आली.
कार्यक्रमात फक्राबादचे सुपुत्र, युवा शास्त्रज्ञ, जैवविविधता संशोधक तथा फायरफ्लाईज एशियन असोसिएशनचे मंडळ सदस्य रणजित रावसाहेब राऊत यांनी विद्यार्थ्यांशी संवाद साधला. त्यांनी काजव्यांच्या प्रकाशनिर्मितीमागील वैज्ञानिक कारणे, हवामान बदल, रासायनिक कीटकनाशकांचा वाढता वापर, प्रकाश प्रदूषण आणि अधिवास नष्ट होत असल्यामुळे काजव्यांची संख्या झपाट्याने घटत असल्याचे सांगितले.
यावेळी ते म्हणाले, “विद्यार्थ्यांनी निसर्ग संवर्धनाची जबाबदारी स्वीकारून वृक्षसंवर्धन, रासायनिक प्रदूषण कमी करणे तसेच पर्यावरण आणि जैवविविधतेच्या संरक्षणासाठी सक्रिय पुढाकार घ्यावा.”
कार्यक्रमादरम्यान विद्यार्थ्यांनी काजव्यांविषयी विविध प्रश्न विचारून आपली उत्सुकता व्यक्त केली. काजव्यांवरील माहितीपर सादरीकरण, चित्रांच्या माध्यमातून मार्गदर्शन तसेच पर्यावरण संरक्षणाची सामूहिक शपथ घेण्यात आली.
या कार्यक्रमास शाळेचे मुख्याध्यापक किरण फापाळे तसेच शिक्षक राजेंद्र हजारे, भगवान साळुंखे, शिवाजी ढोबे, मंजी रीगाढवे, वर्षा साबळे, शिवांजली डूचे आणि सर्व विद्यार्थी मोठ्या संख्येने उपस्थित होते.
उपस्थितांनी अशा उपक्रमांमुळे विद्यार्थ्यांमध्ये विज्ञाननिष्ठ दृष्टीकोन, पर्यावरण संवर्धनाची जाणीव आणि जैवविविधतेप्रती प्रेम निर्माण होत असल्याचे मत व्यक्त केले. कार्यक्रमाची सांगता काजवा संवर्धनाचा संदेश समाजापर्यंत पोहोचविण्याचा निर्धार करून करण्यात आली.
