शहादा | प्रतिनिधी
पूज्य साने गुरुजी विद्या प्रसारक मंडळ, शहादा यांच्या वतीने विद्यार्थ्यांच्या कलागुणांना व्यासपीठ उपलब्ध करून देण्यासाठी दि. ३० जुलै २०२६ रोजी नंदुरबार जिल्हास्तरीय आंतरशालेय एकपात्री अभिनय स्पर्धेचे आयोजन करण्यात आले आहे. ही स्पर्धा मंडळाच्या महात्मा गांधी सभागृहात सकाळी १० वाजता सुरू होणार आहे.
नंदुरबार जिल्ह्यातील अनुदानित, विनाअनुदानित तसेच खाजगी शाळांमधील इयत्ता ५ वी ते १० वीच्या विद्यार्थ्यांना या स्पर्धेत सहभागी होता येणार असून, प्रत्येक शाळेतून जास्तीत जास्त दोन स्पर्धकांना सहभागाची संधी दिली जाणार आहे. स्पर्धकांनी शाळेच्या मुख्याध्यापकांचे अधिकृत शिफारसपत्र सादर करणे आवश्यक राहील.
स्पर्धेतील विजेत्यांना आकर्षक पारितोषिके देण्यात येणार असून, प्रथम क्रमांकासाठी ₹३,०००, द्वितीय ₹२,०००, तृतीय ₹१,००० रोख रक्कम व सन्मानचिन्ह देण्यात येईल. तसेच दोन स्पर्धकांना उत्तेजनार्थ स्मृतिचिन्ह देऊन गौरविण्यात येणार आहे.
इच्छुक स्पर्धकांनी दि. २० जुलै २०२६ पर्यंत संयोजन समितीने उपलब्ध करून दिलेल्या अधिकृत लिंकद्वारे नोंदणी करावी, असे आवाहन करण्यात आले आहे.
मंडळाचे अध्यक्ष बापूसाहेब दीपकभाई पाटील यांनी स्पर्धकांना शुभेच्छा दिल्या असून, उपाध्यक्ष जगदीश पाटील व समन्वयक प्रा. मकरंद पाटील यांच्या मार्गदर्शनाखाली स्पर्धेचे नियोजन करण्यात येत आहे.
स्पर्धेच्या यशस्वी आयोजनासाठी प्राचार्य डॉ. एम. के. पटेल, डॉ. एस. पी. पवार, डॉ. एन. जे. पाटील, डॉ. पी. एल. पटेल, बी. के. सोनी, आर. एस. पाटील, कीर्ती महाडिक तसेच उपप्राचार्य कल्पना पटेल हे परिश्रम घेत आहेत.
स्पर्धेबाबत अधिक माहितीसाठी डॉ. चंद्रशेखर सुतार, डॉ. भरत चौधरी, डॉ. प्रशांत तोरवणे आणि श्री. उज्ज्वल पवार यांच्याशी संपर्क साधावा, असे आवाहन प्रसिद्धीपत्रकाद्वारे करण्यात आले आहे.
