शहादा | प्रतिनिधी
देशसेवेची भावना जोपासत समाजसेवेचे ध्येय उराशी बाळगणाऱ्या शहादा येथील पूज्य साने गुरुजी प्रसारक मंडळाच्या कला, विज्ञान व वाणिज्य महाविद्यालयाच्या तीन एनसीसी कॅडेट्सची महाराष्ट्र पोलीस दलात निवड झाली आहे. या यशामुळे महाविद्यालयात आनंदाचे वातावरण असून सर्व स्तरांतून विद्यार्थ्यांवर अभिनंदनाचा वर्षाव होत आहे.
बादल भिल, हितेश सोनवणे आणि लक्ष्मण पाटील अशी पोलीस दलात निवड झालेल्या गुणवंत कॅडेट्सची नावे आहेत. पोलीस भरतीचे स्वप्न साकार करण्यासाठी त्यांनी अभ्यासासोबतच मैदानी चाचणीची कठोर तयारी केली. त्यांच्या सातत्यपूर्ण मेहनतीचे फळ म्हणून त्यांना हे यश मिळाले.
या यशानिमित्त महाविद्यालयात विशेष सत्कार समारंभाचे आयोजन करण्यात आले. मंडळाचे समन्वयक प्रा. मकरंद पाटील यांच्या हस्ते यशस्वी कॅडेट्सचा पुष्पगुच्छ देऊन सत्कार करण्यात आला. तसेच त्यांच्या भावी सेवेसाठी शुभेच्छा देण्यात आल्या.
पोलीस भरती प्रक्रियेसंदर्भात या विद्यार्थ्यांना वेळोवेळी मार्गदर्शन करणारे एनसीसी विभागाचे कॅप्टन सुभाष भालेराव यांचाही यावेळी विशेष गौरव करण्यात आला. कार्यक्रमाला महाविद्यालयाचे प्राचार्य डॉ. एम. के. पटेल उपस्थित होते.
या उल्लेखनीय यशाबद्दल पूज्य साने गुरुजी प्रसारक मंडळाचे अध्यक्ष दीपकभाई पाटील आणि उपाध्यक्ष जगदीश पाटील यांनी यशस्वी कॅडेट्स तसेच एनसीसी विभागाचे अभिनंदन करून पुढील वाटचालीसाठी शुभेच्छा दिल्या. या यशामुळे महाविद्यालयाच्या नावलौकिकात भर पडल्याची भावना यावेळी व्यक्त करण्यात आली.
