शहादा | प्रतिनिधी
शहादा तालुक्यातील लोणखेडा येथे गुरुवारी दुपारी बँक ऑफ इंडिया समोर अचानक एक जुने लिंबाचे झाड उन्मळून वाहनावर कोसळल्याने कारचे मोठे नुकसान झाले. सुदैवाने वाहनात बसलेल्या एका लहान बालकाचा जीव थोडक्यात बचावला असून मोठी दुर्घटना टळली.
मिळालेल्या माहितीनुसार, लोणखेडा येथील प्रदीप शरदचंद्र सोनवणे हे आपल्या लहान मुलासह बँकेच्या कामासाठी आले होते. त्यांनी एमएच-३९-एक्यू-१२२० क्रमांकाची कार बँकेसमोर उभी करून मुलाला गाडीत बसवून ते बँकेत गेले. काही वेळातच बँकेच्या प्रवेशद्वाराजवळील जुने लिंबाचे झाड अचानक कारवर कोसळले.
झाड कोसळताच गाडीत बसलेल्या बालकाने आरडाओरड केली. त्याचा आवाज ऐकून स्थानिक नागरिक व बँकेतील कर्मचारी तातडीने घटनास्थळी धावले. प्रसंगावधान राखत त्यांनी वाहनाचा दरवाजा उघडून बालकाला सुखरूप बाहेर काढले. या घटनेत बालकाला कोणतीही दुखापत झाली नाही.
स्थानिकांच्या माहितीनुसार, संबंधित लिंबाचे झाड अत्यंत जुने झाले होते. गेल्या वर्षी लोणखेडा–पुरुषोत्तमनगर रस्त्याच्या काँक्रीटीकरणावेळी जेसीबीद्वारे झालेल्या खोदकामामुळे झाडाची मुळे कमकुवत झाली होती. तसेच झाडाशेजारील गटारामुळे सतत ओलावा राहत असल्याने मुळे सडून झाड उन्मळल्याची शक्यता व्यक्त करण्यात येत आहे.
या घटनेत वाहनाचे सुमारे दोन लाख रुपयांचे नुकसान झाल्याचा प्राथमिक अंदाज आहे. जीवितहानी टळली असली तरी परिसरातील जीर्ण व धोकादायक झाडांचे तातडीने सर्वेक्षण करून ती हटवावीत, अशी मागणी नागरिकांनी ग्रामपंचायतीकडे केली आहे.
