कळंबोली | प्रतिनिधी :
कळंबोली परिसरातील सिडको कार्यालयाच्या पाठीमागील झोपडपट्टीत शेळी फार्मच्या नावाखाली सुरू असल्याचा आरोप असलेल्या कथित अमली पदार्थ विक्रीच्या अड्ड्यावर गुरुवारी पनवेल महानगरपालिका आणि पोलिस विभागाने संयुक्त कारवाई करत अतिक्रमण हटविले. बुलडोझरच्या साहाय्याने करण्यात आलेल्या या कारवाईमुळे परिसरातील ड्रग्सविरोधी मोहिमेला बळ मिळाल्याची प्रतिक्रिया नागरिकांनी व्यक्त केली.
यापूर्वी ११ मार्च रोजी पोलिसांच्या नार्कोटिक्स विभागाचे अधिकारी संदीप निगडे यांच्या पथकाने याच ठिकाणी छापा टाकून वसीम लुंगी याला अमली पदार्थ प्रकरणात अटक केली होती. त्यानंतर आवश्यक प्रशासकीय प्रक्रिया पूर्ण करून संबंधित ठिकाणावरील अतिक्रमण हटविण्याची कारवाई करण्यात आली.
पनवेल महानगरपालिकेचे आयुक्त मंगेश चितळे यांच्या आदेशानुसार ही मोहीम राबविण्यात आली. अतिरिक्त आयुक्त महेश मेघमाले आणि कळंबोली प्रभाग अधिकारी सुबोध ठाणेकर यांच्या मार्गदर्शनाखाली प्रभाग निरीक्षक अरविंद पाटील यांनी कारवाईचे नेतृत्व केले. कोणताही अनुचित प्रकार घडू नये म्हणून घटनास्थळी मोठा पोलिस बंदोबस्त तैनात करण्यात आला होता.
या कारवाईदरम्यान नार्कोटिक्स विभागाचे अधिकारी संदीप निगडे उपस्थित होते. तसेच या प्रकरणाचा पाठपुरावा करणाऱ्या समाजसेविका प्रियांका गाडे यांनीही घटनास्थळी उपस्थित राहून कारवाईची पाहणी केली.
प्रशासनाच्या या संयुक्त कारवाईमुळे अमली पदार्थांच्या अवैध व्यवसायाविरोधात कठोर भूमिका घेतल्याचा स्पष्ट संदेश गेला असून, परिसरातील नागरिकांनी या कारवाईचे स्वागत केले आहे.
