नातेपुते | प्रतिनिधी :
आषाढी वारीच्या पार्श्वभूमीवर शनिवार, १९ जुलै २०२६ रोजी संत ज्ञानेश्वर माऊलींच्या पालखीचे नातेपुते येथे मोठ्या उत्साहात आणि भक्तिमय वातावरणात आगमन झाले. पालखीचे दर्शन घेण्यासाठी भाविकांनी मोठी गर्दी केली होती. टाळ-मृदंगाच्या गजरात, अभंग, गौळणी आणि भारुडांच्या सुरावटींनी संपूर्ण परिसर विठ्ठलनामाने दुमदुमून गेला.
पहाटेपासूनच विविध भागांतून लहान-मोठ्या दिंड्या आणि पालख्या बरड मार्गे नातेपुतेकडे दाखल होत होत्या. तर नातेपुतेसह परिसरातील पुरुष, महिला आणि वारकरी मोठ्या श्रद्धेने पालखीच्या स्वागतासाठी व दर्शनासाठी रस्त्यावर उतरले होते.
यावेळी नातेपुते येथील मुख्य रस्त्यालगत, एसटी स्थानकाजवळ महाराष्ट्र शासनाच्या मुख्यमंत्री सहाय्यता निधी व धर्मादाय रुग्णालय कक्षाच्या “आम्ही सेवेकरी माऊलीचे” या उपक्रमांतर्गत वारकऱ्यांची चरणसेवा करण्यात आली. या सेवाकार्यात नातेपुते येथील विविध शाळा व महाविद्यालयांतील विद्यार्थी-विद्यार्थिनी उत्साहाने सहभागी झाले होते. शिक्षकांच्या मार्गदर्शनाखाली त्यांनी वारकऱ्यांची सेवा करून सामाजिक बांधिलकीचा आदर्श घालून दिला.
पालखी आगमनामुळे संपूर्ण नातेपुते गाव भक्तिरसात न्हाऊन निघाले असून, सर्वत्र विठ्ठलनामाचा गजर आणि भक्तीमय वातावरण अनुभवायला मिळत आहे.
माऊलींच्या पालखीचा शनिवारी नातेपुते येथे मुक्काम असून, रविवारी सकाळी पालखी पंढरपूरच्या दिशेने प्रस्थान करणार आहे. त्यामुळे भाविकांची मोठी गर्दी नातेपुतेमध्ये कायम आहे.
