🍁शक्ती-शांतीचा हिशोबाचा मेळ!

3919🪔सोमवार, ३१ आँगस्ट २०२६

      डायोजिनिस म्हणून अलेक्झँडरच्या काळात एक साधु होता. एकदम निरहंकार ! तो एक दिवस गवत खात बसला होता. तर तिकडून अलेक्झेंडरचा एक सरदार चालला होता. त्याच्या मागोमाग अलेक्झेंडर येत होता. डायोजिनिसला, तो सरदार म्हणायला लागला, "अरे, डायोजिनिस, तू काय खातो आहेस ते? गवत ? अरे, तू अलेक्झेंडरला मानायला सुरुवात कर, त्याची थोडी स्तुति कर. तुझ्यावर गवत खाण्याची पाळी येणार नाही."

      त्यावर डायोजिनिसने त्याला मान वर करून सांगितलं, की, "तू थोडीशी गवत खायची सवय कर. म्हणजे तुला अलेक्झेंडरची खोटी स्तुति करायची पाळी येणार नाही कधी!"

      हे ऐकल्याबरोबर तो सरदार कातावला; त्याने तलवार बाहेर काढली आणि तो त्याला मारायला निघाला. तोपर्यंत मागून अलेक्झेंडर येत होता. तो म्हणाला, " तू काय करतो आहेस ? "

      सरदार म्हणाला, " महाराज, तुमचा अपमान केला याने." अलेक्झँडर म्हणाला, " त्याला मारू नको; तू त्याला ओळखत नाहीस." अलेक्झँडर पुढे म्हणाला, " हे पहा, मी आज सम्राट अलेक्झेंडर आहे. पण मी जर सम्राट नसतो, राजा नसतो, आणि लढवय्याचा पेशा स्विकारला नसता, तर मी डायोजिनिस होणं पत्करलं असतं. "

      लक्षात ठेवा, मोठ्यांचं मागणं हे असं असतं. तो त्याच्याशी नम्र झालेला होता. तो त्याला वाट्टेल ते बोलू द्यायचा, त्याला काहीही मागू द्यायचा. पण डायोजिनिस मागतच नसे मुळी काही. अलेक्झँडरने कितीही अत्याचार केले असतील, काही असेल, पण कुठेतरी नम्र व्हायला शिकलेली ही माणसं असतात. ती वर जातात. ती जग जिंकतात. त्यांचं ध्यान लागेल, यात मला काही शंका वाटत नाही.

      झोकून देणं, कुठेतरी 'मी' समर्पण करणं, ही एक वृत्ती असते माणसाची. हे एक आयुष्य असतं. *मला स्वतःला मोठं होता आलं नाही, तर ज्याने मोठं होणं पत्करलेलं आहे, आणि ते मला पटलेलं आहे, तिथे मी माझा अहंकार बाजूला ठेवेन. असं म्हटलं, तरी ध्यान चांगलं लागेल.*

      आता फक्त एवढंच लक्षात ठेवा की, आपण ध्यानाच्या अवस्थेत जाताना, शून्याच्या अवस्थेत जाताना, त्यात, पहिल्यांदा आपण गतीच्या अवस्थेत काय केलं याचा जाब ध्यानाची अवस्था मागत असते. *तुम्ही ध्यानाची शांति मागत असता, त्यावेळेला ध्यानाची अवस्था, तू शक्तीच्या वेळेला शक्तीचा उपयोग कसा केलास, त्याचा हिशोब मागत असते.* तो हिशोब आपल्याला प्रामाणिकपणे देता आला, तर सबंध आपलं आयुष्य पालटून जाईल, एवढंच मी सांगतो, आणि तिथे थांबतो. हरि ॐ
                                     *— स्वामी विज्ञानानंद*

मनशक्ती ग्रंथ : ‘ध्यानपाठ’ भाग २ मधून
Manashakti Research Centre, Lonavla 02114234330/ 9923474066

www.manashakti.org

शिक्षणातून राष्ट्रकल्याण मनशक्ती आयोजित तिसरी शिक्षण परिषद
plz forward this link to your known Teachers & Educators….👇🏻