धारूर : प्रहार संघटनेच्या बीड जिल्हा शाखा विस्तार व सभासद नोंदणी मोहिमेला जिल्ह्यात उत्स्फूर्त प्रतिसाद मिळत असून, आज दि. १ सप्टेंबर रोजी सोनिमोहा, ता. धारूर येथे प्रहार संघटनेची शाखा मोठ्या उत्साहात स्थापन करण्यात आली. प्रहार संघटनेचे बीड जिल्हाध्यक्ष रघुनाथ तोंडे यांच्या हस्ते शाखेचे उद्घाटन करण्यात आले.
ढोल-ताशांच्या गजरात झालेल्या या शाखा स्थापना कार्यक्रमास गावातील युवक, ज्येष्ठ नागरिक व शेकडो प्रहार कार्यकर्ते मोठ्या संख्येने उपस्थित होते. गावातील तरुण कार्यकर्त्यांनी प्रहार संघटनेच्या विचारांशी जोडले जात संघटना मजबूत करण्याचा निर्धार व्यक्त केला.
यावेळी सोनिमोहा गावचे भूषण तथा सर्वात कमी वयात किल्ले धारूर मार्केट कमिटीचे सभापती मंगेश महादेवराव तोंडे, मुकादम अशोक तोंडे, विष्णूपंत तोंडे, महारुद्र तोंडे, रामराज तोंडे, ब्रह्मदेव तोंडे, वैजनाथ तोंडे, आंगद गोरे, आडागळे कंपनी यांच्यासह अनेक मान्यवरांची विशेष उपस्थिती होती.
या शाखेच्या अध्यक्षपदी जनक पांचाळ, उपाध्यक्ष पदी केशव तोंडे तर सचिवपदी आश्रुबा गोरे यांची निवड करण्यात आली. नवनियुक्त पदाधिकाऱ्यांचा यावेळी सत्कार करण्यात आला.
“गावागावात प्रहार संघटनेची मजबूत संघटनात्मक बांधणी करून शेतकरी, दिव्यांग, कष्टकरी, युवक व सर्वसामान्य नागरिकांच्या प्रश्नांसाठी प्रभावीपणे लढा उभारणार,” असा निर्धार जिल्हाध्यक्ष रघुनाथ तोंडे यांनी व्यक्त केला.
सोनिमोहा येथे झालेल्या या शाखा स्थापनेमुळे परिसरात प्रहार संघटनेला नवी ताकद मिळाली असून, आगामी काळात सभासद नोंदणी व शाखा विस्ताराची मोहीम अधिक व्यापक करण्याचा निर्धार यावेळी करण्यात आला.
