दोन राज्यांच्या पोलिसांची संयुक्त शोधमोहीम; चिखली परिसरात कडक बंदोबस्त
प्रतिनिधी: शेख मोईन
किनवट:किनवट येथून रविवारी ३० ऑगस्ट रात्री तेलंगणा पोलिसांच्या ताब्यातून जमावाने हल्ला करून पळवून नेलेल्या आरोपीला अखेर चिखली परिसरातून पुन्हा ताब्यात घेण्यात पोलिसांना यश आले आहे. या कारवाईमुळे परिसरात पसरलेला तणाव निवळण्यास मदत झाली आहे.
तेलंगणातील बाजार हातनूर पोलिसांच्या गुन्ह्यात मागील १० महिन्यांपासून गुंगारा देणारा आरोपी शेख जाफर उर्फ बाखर शेख आदम वय ४५ रा. चिखली याला रविवारी सायंकाळी तेलंगणा पोलिसांच्या पथकाने किनवट येथील करम हॉटेल परिसरातून ताब्यात घेतले होते. नियमानुसार किनवट पोलीस ठाण्यात नोंद करून तेलंगणाचे पोलीस उपनिरीक्षक रमेश परशुराम गोकाला व त्यांचे कर्मचारी आरोपीला वाहनाने घेऊन जात होते.
दरम्यान, गोकुळनगर परिसरातील चिखली फाट्याजवळ आरोपीच्या नातेवाईकांनी व साथीदारांनी पोलिसांचे वाहन अडवून जोरदार हल्ला चढवला. पोलिसांशी झटापट करत जमावाने आरोपीला हातकडीसह पळवून नेले. स्वतःच्या बचावासाठी आणि जमावाला पांगवण्यासाठी तेलंगणा पोलिसांनी हवेत एक राऊंड गोळीबार केला होता.
घटनेचे गांभीर्य ओळखून भोकर विभागाच्या अतिरिक्त पोलीस अधीक्षक अर्चना पाटील यांच्या मार्गदर्शनाखाली किनवट पोलिसांनी तात्काळ तपास चक्रे फिरवली. तसेच आदिलाबाद आणि निर्मल येथूनही तेलंगणा पोलिसांचा मोठा फौजफाटा दाखल झाला होता.
दोन्ही राज्यांच्या पोलिसांनी चिखली व आसपासच्या परिसरात संयुक्त शोधमोहीम राबवून पसार झालेला आरोपी शेख बकर याला सोमवारी ३१ ऑगस्ट दुपारी पुन्हा बेड्या ठोकल्याया कारवाईनंतर आरोपीची पुढील कायदेशीर प्रक्रियेसाठी रवानगी करण्यात येत असून त्याला न्यायालयासमोर हजर केले जाणार आहे. कोणताही अनुचित प्रकार घडू नये यासाठी चिखली गावात सध्या कडक पोलीस बंदोबस्त तैनात करण्यात आला असून परिस्थिती पूर्णपणे नियंत्रणात आहे.
