सौ. सविता विकास तळेकर यांचे आवाहन; जिल्हा परिषद व आमदार तानाजीराव सावंत यांच्या माध्यमातून निधी उपलब्ध करून स्थानिक प्रश्न सोडविणार
वाशी तालुका प्रतीनीधीराजेंद्र आहिरे : पारगाव जिल्हा परिषद गटातील विविध गावांच्या विकासकामांना गती देण्यासाठी आयोजित करण्यात आलेल्या पारगाव प्रभाग समिती बैठकीस नागरिकांनी मोठ्या संख्येने उपस्थित राहावे, असे आवाहन प्रभाग समितीच्या अध्यक्षा तथा जिल्हा परिषद सदस्या सौ. सविता विकास तळेकर यांनी केले आहे.
बुधवार, दि. १९ ऑगस्ट २०२६ रोजी सकाळी ११ वाजता पारगाव ग्रामपंचायत कार्यालयाच्या सभागृहात प्रभाग समितीची बैठक आयोजित करण्यात आली आहे.
या बैठकीमध्ये पारगाव जिल्हा परिषद गटातील विविध गावांमधील रस्ते, पाणीपुरवठा, शाळा, अंगणवाडी, स्वच्छता, नाली, पथदिवे, सामाजिक सुविधा तसेच इतर प्रलंबित विकासकामांबाबत नागरिकांकडून प्रश्न व मागण्या जाणून घेण्यात येणार आहेत.
स्थानिक नागरिकांनी मांडलेल्या प्रश्नांवर संबंधित विभागाच्या अधिकाऱ्यांशी चर्चा करून त्यावर मार्ग काढण्याचा प्रयत्न केला जाणार आहे. तसेच आवश्यक विकासकामांसाठी जिल्हा परिषद धाराशिवच्या माध्यमातून तसेच मतदारसंघाचे आमदार मा. तानाजीराव सावंत साहेब यांच्या माध्यमातून आवश्यक निधी उपलब्ध करून घेऊन स्थानिक नागरिकांचे प्रश्न प्राधान्याने सोडविण्यासाठी प्रयत्न केले जातील, अशी माहिती सौ. सविता विकास तळेकर यांनी दिली.
गावाच्या विकासासाठी केवळ प्रशासनाची यंत्रणा नव्हे, तर नागरिकांचा सहभागही महत्त्वाचा आहे. त्यामुळे प्रत्येक गावातील नागरिकांनी आपल्या गावातील प्रलंबित प्रश्न, आवश्यक विकासकामे आणि मूलभूत सुविधांबाबतच्या मागण्या बैठकीत मांडाव्यात. नागरिकांच्या मागण्यांचा प्राधान्यक्रम निश्चित करून संबंधित विभागांकडून कार्यवाही करण्यासाठी पाठपुरावा केला जाणार आहे.
“पारगाव जिल्हा परिषद गटातील प्रत्येक गावाचा सर्वांगीण विकास व्हावा, हा आमचा प्रयत्न आहे. नागरिकांनी बैठकीत प्रत्यक्ष सहभागी होऊन आपले प्रश्न मांडावेत. जिल्हा परिषद धाराशिव तसेच मतदारसंघाचे आमदार मा. तानाजीराव सावंत साहेब यांच्या माध्यमातून आवश्यक निधी उपलब्ध करून घेऊन विकासकामे मार्गी लावण्यासाठी आपण सातत्याने पाठपुरावा करू,” असे आवाहन सौ. सविता विकास तळेकर यांनी केले.
