आगीच्या दुर्घटनेपासून बचावासाठी विद्यार्थ्यांना अग्निशमन विभागाचे प्रशिक्षण
उरण, दि. १० (विठ्ठल ममताबादे) द्रोणागिरी उरण येथे असलेल्या एस. एस. पाटील इंटरनॅशनल स्कूल मध्ये विद्यार्थ्यांमध्ये आग प्रतिबंधक उपाययोजनांबाबत जनजागृती निर्माण करण्याच्या उद्देशाने फायर अवेअरनेस प्रोग्रामचे आयोजन करण्यात आले. या कार्यक्रमात अग्निशमन विभागाच्या अधिकाऱ्यांनी विद्यार्थ्यांना आग लागण्याची कारणे, संभाव्य धोके तसेच आग लागल्यानंतर घ्यावयाची काळजी याबाबत सविस्तर मार्गदर्शन केले.
अग्निशमन विभागाचे उप अग्निशमन अधिकारी अमित कांबळी आणि लिडिंग फायरमेन सागर साळुंके यांनी विद्यार्थ्यांना आग कशी व कुठे लागू शकते, आगीची प्रमुख कारणे कोणती, आग लागल्यास घाबरून न जाता कोणत्या उपाययोजना कराव्यात, तसेच आग विझविण्याच्या विविध पद्धती याबाबत माहिती दिली. यावेळी विद्यार्थ्यांना प्रत्यक्ष प्रात्यक्षिक करून दाखवत आग प्रतिबंधक उपायांची माहिती देण्यात आली.
आगीची दुर्घटना घडल्यास स्वतःचा बचाव करताना इतरांच्या सुरक्षिततेचीही काळजी कशी घ्यावी, आपत्कालीन परिस्थितीत कोणती खबरदारी घ्यावी, याबाबतही विद्यार्थ्यांना मार्गदर्शन करण्यात आले.
या कार्यक्रमास एस. एस. पाटील इंटरनॅशनल स्कूलच्या सल्लागार स्वातीताई म्हात्रे, मुख्याध्यापिका मृदुला धोंडी,सहसचिव किरण घरत, रायगड जिल्हा क्रिकेट असोसिएशनचे उपाध्यक्ष राजेश पाटील, महाराष्ट्र शासन शिवछत्रपती पुरस्कार प्राप्त सूर्यकांत ठाकूर, जेएनपीटीचे कर्मचारी संदीप पाटील तसेच स्कुलचे सर्व शिक्षक, कर्मचारीवर्ग आणि पालक उपस्थित होते.
विद्यार्थ्यांनी या मार्गदर्शनपर कार्यक्रमात मोठ्या उत्साहाने सहभाग घेतला. प्रत्यक्ष प्रात्यक्षिकांमुळे विद्यार्थ्यांना आगीच्या प्रसंगी घ्यावयाच्या खबरदारीची तसेच सुरक्षिततेच्या उपाययोजनांची अधिक प्रभावीपणे माहिती मिळाली.
दरम्यान, कोणत्याही ठिकाणी आग लागल्यास नागरिकांनी तातडीने अग्निशमन विभागाशी 8104961941 किंवा 022-69365600 या क्रमांकांवर संपर्क साधावा, असे आवाहन अग्निशमन विभागाच्या वतीने करण्यात आले.
