सभापती अभिजित पाटील यांचा व्यापारी वर्गातर्फे सत्कार; शेतकरी-व्यापाऱ्यांसाठी सुविधा वाढविण्यावर भर
शहादा, दि. २६ (प्रतिनिधी) :
शहादा तालुका कृषी उत्पन्न बाजार समितीच्या आवारात सुरू असलेल्या विविध विकासकामांची पाहणी तसेच प्रस्तावित नवीन विकासकामांचे भूमिपूजन उत्साहात पार पडले. या कार्यक्रमास शहादा तालुका व परिसरातील शेतकरी, व्यापारी तसेच बाजार समितीशी संबंधित विविध घटक मोठ्या संख्येने उपस्थित होते.
बाजार समितीचे सभापती अभिजित पाटील यांच्या उपस्थितीत शेतकरी व व्यापारी बांधवांसोबत बाजार समिती परिसरातील सुरू असलेल्या विकासकामांची पाहणी करण्यात आली. यावेळी शेतकरी भवन, सोलार पॅनल प्रकल्प तसेच इतर विविध विकासकामांचा आढावा घेण्यात आला. तसेच प्रस्तावित नवीन विकासकामांचे भूमिपूजनही करण्यात आले.
शेतकरी व व्यापारी वर्गाच्या सोयी-सुविधांमध्ये वाढ करण्याच्या उद्देशाने बाजार समितीच्या माध्यमातून सुरू असलेल्या विकासकामांबाबत उपस्थितांनी समाधान व्यक्त केले. बाजार समितीच्या विकासासाठी सुरू असलेल्या विविध कामांचे व्यापारी वर्गाने कौतुक केले.
या प्रसंगी व्यापारी वर्गाच्या वतीने बाजार समितीचे सभापती अभिजित पाटील यांचा सत्कार करण्यात आला. व्यापारी चंद्रकांत पारसमल कोठडिया, पंकज जसराज जैन, निलेश छाजेड आणि शुभम जैन यांनी सभापती अभिजित पाटील यांचा सत्कार करून त्यांच्या कामाचे कौतुक केले.
बाजार समितीतील सुरू असलेल्या विकासकामांमुळे शेतकरी व व्यापारी वर्गासाठी आवश्यक पायाभूत सुविधा अधिक सक्षम होण्यास मदत होणार असून, बाजार समितीच्या विकासाला यामुळे नवी दिशा मिळेल, अशी भावना यावेळी उपस्थितांनी व्यक्त केली.
