अनंत चतुर्दशीला महिलांच्या गरबा, लेझीम व पारंपरिक नृत्याने वेधले लक्ष; बारा दिवस विविध सामाजिक, शैक्षणिक व धार्मिक उपक्रम
शहादा, दि. २६ (प्रतिनिधी) :
शहादा शहरातील दीनदयाल नगर येथील श्री शिवछत्रपती ग्रुप निळकंठेश्वर मंदिर गणेशोत्सव २०२६ ची अनंत चतुर्दशीच्या दिवशी उत्साहपूर्ण वातावरणात सांगता झाली. गणरायाला भावपूर्ण निरोप देण्यासाठी महिला भाविकांनी विशेष तयारी केली होती. वाद्यांच्या तालावर महिलांच्या ग्रुपने गरबा, लेझीम आणि पारंपरिक नृत्याची सुरेख प्रात्यक्षिके सादर करत संपूर्ण परिसर दुमदुमून सोडला. शिस्तबद्ध पद्धतीने पार पडलेल्या या उपक्रमाचे परिसरातून कौतुक करण्यात आले.
या निरोप सोहळ्यात शहादा नगरपालिकेच्या उपनगराध्यक्ष सौ. माधवी मकरंद पाटील, नगरसेविका तथा शिक्षण सभापती सौ. भावना चंद्रभान कदम, सौ. प्रतिभा ज्ञानेश्वर चौधरी यांच्यासह सौ. रूपाली विजय चौधरी, सौ. प्रतिभा दीपक कोळी, सौ. पुनम संजीव क्षीरसागर, सौ. पुष्पा नितीन कोळी, सौ. भूमी लक्ष्मीकांत अग्रवाल, सौ. सुरेखा शिंदे, सौ. सुनीता भावसार, सौ. प्रियांका तांबोळी, सौ. स्नेहा तांबोळी, सौ. योगिता चौधरी, सौ. माधुरी चौधरी, सौ. शितल मराठे, सौ. अलका बडगुजर तसेच शिवछत्रपती महिला ग्रुप गणेश मंडळाच्या सदस्य मोठ्या संख्येने सहभागी झाल्या.
गणेशोत्सव यशस्वी करण्यासाठी शिवछत्रपती ग्रुपचे संस्थापक तथा शहादा नगरपालिकेचे ज्येष्ठ नगरसेवक ज्ञानेश्वर चौधरी, अध्यक्ष विजय चौधरी, पदाधिकारी लक्ष्मीकांत अग्रवाल, डॉ. चंद्रभान कदम, दिनेश तांबोळी, दीपक शिंदे, नितीन कोळी, संजय क्षीरसागर, दीपक कोळी आदींनी बारा दिवस विशेष परिश्रम घेतले.
गणेशोत्सवाच्या बारा दिवसांच्या कालावधीत ग्रुपच्या वतीने विविध क्षेत्रातील मान्यवरांना आमंत्रित करून आरतीचा मान देण्यात आला. तसेच विविध क्षेत्रांत उल्लेखनीय कार्य करणाऱ्या यशस्वी व नामवंत व्यक्तींचा सत्कार करण्यात आला. उत्सवाच्या कालावधीत ज्या सदस्यांचे वाढदिवस आले, त्यांचे वाढदिवसही मंडळाच्या वतीने उत्साहात साजरे करण्यात आले.
सामाजिक, शैक्षणिक आणि धार्मिक उपक्रमांसोबतच पर्यावरण रक्षणाचा संदेश देणारे विविध कार्यक्रमही ग्रुपच्या वतीने राबविण्यात आले. सत्यनारायण पूजन तसेच महाप्रसाद वाटपाचा कार्यक्रमही भक्तिभावाने पार पडला. विविध उपक्रमांमुळे यंदाचा गणेशोत्सव परिसरातील नागरिकांसाठी सामाजिक सहभाग आणि उत्साहाचा केंद्रबिंदू ठरला.
