सहा वर्षांपासून रखडलेले काम; भूमी अभिलेख व सार्वजनिक बांधकाम विभागाकडून जागेची मोजणी पूर्ण
सोनगीर, ता. २६ (प्रतिनिधी) :
मुडावद (ता. शिंदखेडा) येथील तापी-पांझरा संगमावरील कपिलेश्वर मंदिराला जोडणारा सुमारे सहा कोटी रुपये खर्चाचा पादचारी पूल गेल्या सहा वर्षांपासून अपूर्ण अवस्थेत आहे. याबाबत दैनिक सकाळने ३० जून रोजी आवाज उठवल्यानंतर भूमी अभिलेख विभाग व सार्वजनिक बांधकाम विभागाने पुलाच्या पायऱ्या आणि पोहोच रस्त्यासाठी आवश्यक जागेची अधिकृत मोजणी पूर्ण केली आहे. त्यामुळे पुलाचे उर्वरित काम लवकरच मार्गी लागण्याची शक्यता निर्माण झाली आहे.
पुलाचे काम अपूर्ण राहिल्याने भाविकांसह ग्रामस्थांना मोठ्या अडचणींचा सामना करावा लागत होता. पुलाचा पोहोच रस्ता खासगी शेतजमिनीमधून जात असल्याने जमीन संपादन करून योग्य मोबदला दिल्याशिवाय रस्ता देण्यास संबंधित शेतकऱ्याने नकार दिल्याने काम रखडले होते.
सध्या पुलावर जाण्यासाठी तात्पुरत्या पायऱ्या तयार करण्यात आल्या आहेत. मात्र या पायऱ्यांचा लहान मुले व ज्येष्ठ नागरिकांना त्रास होत आहे. पुलाचे काम पूर्ण करण्यासाठी सामाजिक कार्यकर्ते नथू धनगर यांनी प्रशासनाकडे सातत्याने पाठपुरावा केला. आता प्रत्यक्ष मोजणी प्रक्रिया पूर्ण झाल्याने त्यांनी समाधान व्यक्त केले आहे.
भूमी अभिलेख शिंदखेडा विभागाचे भूमापक ओम पवार आणि सार्वजनिक बांधकाम विभागाचे उपअभियंता अजय पवार यांच्या मार्गदर्शनाखाली मोजणी करण्यात आली. यावेळी ग्रामसेवक संजय माळी, सामाजिक कार्यकर्ते रोहिदास वाकडे, दगडू निळे आणि शेतकरी मंगेश कोळी उपस्थित होते.
