इयत्ता चौथीत शिकणारा रोहित वाडघे जखमी; त्र्यंबकेश्वर ग्रामीण रुग्णालयात उपचारासाठी दाखल
वाघेरा, ता. त्र्यंबकेश्वर, जि. नाशिक | प्रतिनिधी
त्र्यंबकेश्वर तालुक्यातील वाघेरा गावालगत असलेल्या पाड्यावर बिबट्याने एका चिमुरड्यावर हल्ला केल्याची घटना घडली. या हल्ल्यात इयत्ता चौथीत शिकणारा रोहित लालू वाडघे हा विद्यार्थी जखमी झाला असून, त्याला उपचारासाठी त्र्यंबकेश्वर ग्रामीण रुग्णालयात दाखल करण्यात आले आहे. या घटनेमुळे परिसरातील नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, रोहित हा आपल्या आजीसोबत शेताकडे जात असताना अचानक बिबट्याने त्याच्यावर हल्ला केला. या हल्ल्यात तो जखमी झाला. घटनेची माहिती मिळताच वन विभागाच्या कर्मचाऱ्यांनी घटनास्थळी धाव घेतली. त्यानंतर जखमी रोहितला तातडीने त्र्यंबकेश्वर ग्रामीण रुग्णालयात उपचारासाठी दाखल करण्यात आले.
वाघेरा परिसरात बिबट्याच्या हल्ल्याची घटना घडल्याने नागरिकांमध्ये चिंतेचे वातावरण आहे. शेतावर जाणारे शेतकरी, महिला आणि शाळकरी विद्यार्थ्यांच्या सुरक्षिततेचा प्रश्न पुन्हा ऐरणीवर आला आहे.
परिसरात वन विभागाने गस्त वाढवावी आणि बिबट्याचा बंदोबस्त करण्यासाठी तातडीने आवश्यक उपाययोजना कराव्यात, अशी मागणी स्थानिक नागरिकांकडून केली जात आहे. नागरिकांनीही वन विभागाच्या सूचनांचे पालन करून सतर्क राहण्याची गरज व्यक्त होत आहे.
