ठाणेदार सागर दानडे यांच्या मार्गदर्शनाखाली शहरातील प्रमुख मार्गांवर संचलन; शांतता व सुरक्षिततेचा संदेश
मारेगाव | प्रतिनिधी :
सारथी महाराष्ट्राचा न्यूज
मारेगाव : दसरा सण आणि दुर्गा देवी विसर्जनाच्या पार्श्वभूमीवर शहरातील कायदा व सुव्यवस्था अबाधित राहावी, तसेच नागरिकांमध्ये सुरक्षिततेची भावना निर्माण व्हावी, या उद्देशाने मारेगाव पोलीस ठाण्याच्या वतीने शहरात रूट मार्च काढण्यात आला. पोलीस निरीक्षक सागर दानडे यांच्या मार्गदर्शनाखाली मंगळवारी सायंकाळी ४.३० वाजता हा रूट मार्च पार पडला.
या संचलनात पोलीस उपनिरीक्षक रवी बोरकुले, पोलीस कर्मचारी, महिला पोलीस कर्मचारी आणि होमगार्ड सहभागी झाले होते. शिस्तबद्ध पद्धतीने काढण्यात आलेल्या या रूट मार्चमुळे शहरातील प्रमुख मार्गांवर पोलिसांची उपस्थिती दिसून आली.
मारेगाव पोलीस ठाणे परिसरातून रूट मार्चला सुरुवात झाली. त्यानंतर आंबेडकर चौक, ए. पी. जे. अब्दुल कलाम चौक, गोशिया मशीद चौक, छत्रपती शिवाजी चौक, नगरपंचायत आणि मार्डी चौक या प्रमुख मार्गांवरून संचलन करण्यात आले. त्यानंतर रूट मार्चची सांगता मारेगाव पोलीस ठाणे परिसरात झाली.
दसरा आणि दुर्गा देवी विसर्जनाच्या काळात नागरिकांनी शांतता, संयम आणि सामाजिक सलोखा राखून सण उत्साहात साजरा करावा, हा या उपक्रमामागील प्रमुख उद्देश होता. सण-उत्सव शांततेत आणि सुरक्षित वातावरणात पार पडावेत, यासाठी पोलीस प्रशासनाकडून आवश्यक खबरदारी घेण्यात येत आहे.
मारेगाव पोलिसांच्या या रूट मार्चमधून नागरिकांना शांतता आणि सुरक्षिततेचा संदेश देण्यात आला.
