दूषित पाण्यामुळे विद्यार्थ्यांना होणाऱ्या त्रासाची दखल; मुख्याध्यापक, शाळा व्यवस्थापन समिती आणि ग्रामपंचायतीचा पुढाकार
तेल्हारा : प्रतिनिधी
पिवंदळ बु. येथील जिल्हा परिषद मराठी शाळेत विद्यार्थ्यांच्या आरोग्याचा विचार करून लवकरच आरओ (RO) वॉटर फिल्टर बसविण्यात येणार आहे. या निर्णयामुळे विद्यार्थ्यांना शाळेतच शुद्ध आणि थंड पाणी उपलब्ध होणार असून, पालकांमध्येही समाधानाचे वातावरण आहे.
शाळेतील काही विद्यार्थ्यांना दूषित पाण्यामुळे पोटदुखी आणि इतर आरोग्यविषयक त्रासांना सामोरे जावे लागत असल्याचे सांगण्यात आले. ही बाब लक्षात घेऊन शाळेचे मुख्याध्यापक, शाळा व्यवस्थापन समिती आणि ग्रामपंचायतीच्या वतीने शाळेत आरओ वॉटर फिल्टर बसविण्याचा निर्णय घेण्यात आला आहे.
विद्यार्थी आणि पालकांमध्ये आनंदाचे वातावरण
शाळेत शुद्ध पाण्याची सुविधा उपलब्ध होणार असल्याची माहिती मिळताच विद्यार्थी आणि पालकांमध्ये आनंद व्यक्त करण्यात येत आहे. लवकरच फिल्टर बसविण्याचे काम पूर्ण होऊन विद्यार्थ्यांना शाळेतच शुद्ध व थंड पाणी मिळेल, अशी माहिती शाळेचे मुख्याध्यापक श्याम कुमार अंकुरकर यांनी दिली.
या उपक्रमासाठी सरपंच, ग्रामसेवक, शाळा व्यवस्थापन समितीचे अध्यक्ष आणि सर्व सदस्यांचे सहकार्य लाभत आहे.
‘स्वच्छ पाणी हा विद्यार्थ्यांचा हक्क’
याबाबत जय गजानन आरओ सेल्स सर्व्हिसचे संचालक तेजराव राऊत म्हणाले, “शाळा हे ज्ञानाचे मंदिर आहे. तिथे मुलांना शुद्ध पाणी मिळायलाच हवे. ‘स्वच्छ पाणी आपला हक्क’ या उपक्रमाला आमचे सहकार्य राहील.”
विद्यार्थ्यांच्या आरोग्याच्या दृष्टीने शाळेत शुद्ध पाण्याची सुविधा उपलब्ध करून देण्याचा हा उपक्रम महत्त्वपूर्ण ठरणार आहे. आरओ फिल्टर बसविण्याचे काम लवकर पूर्ण झाल्यास विद्यार्थ्यांना सुरक्षित पिण्याचे पाणी मिळण्यास मदत होईल.
