सामाजिक कार्याची दखल; नियुक्तीनंतर खटाव तालुका पत्रकार संघ आणि निमसोड ग्रामस्थांच्या वतीने सत्कार
खटाव : प्रतिनिधी
राजधानी मराठी पत्रकार संघ, महाराष्ट्र राज्य यांच्या खटाव तालुका पत्रकार संघाच्या सचिवपदी नितीन पांडुरंग राठोड यांची नियुक्ती करण्यात आली आहे. संघाचे संस्थापक श्री. जीवन मोहिते यांच्या हस्ते तसेच संघाच्या पदाधिकाऱ्यांच्या उपस्थितीत त्यांना नियुक्तीचे प्रमाणपत्र देण्यात आले. या नियुक्तीमुळे त्यांना तालुका कार्यकारिणीत काम करण्याची संधी मिळाली आहे.
नितीन राठोड हे गेल्या अनेक वर्षांपासून सामाजिक, राजकीय आणि शैक्षणिक क्षेत्रातील विविध उपक्रमांमध्ये हातभार लावत आहेत. ग्रामीण भागातील महिला आणि पुरुषांना तहसील कार्यालयातील विविध शासकीय कामांसाठी मदत करणे, दिव्यांग व्यक्तींना दिव्यांगत्व प्रमाणपत्र मिळविण्यासाठी मार्गदर्शन करणे तसेच गरजू महिलांच्या लहान-मोठ्या अडचणी सोडविण्यासाठी सहकार्य करणे, अशा विविध माध्यमांतून त्यांनी समाजकार्य केले आहे.
गेल्या वर्षभरापासून सामाजिक कार्यासोबतच पत्रकारितेच्या माध्यमातूनही त्यांनी गोरगरीब आणि गरजू नागरिकांचे प्रश्न मांडण्याचा प्रयत्न केला आहे. त्यांच्या सामाजिक कार्याची आणि पत्रकारितेतील योगदानाची दखल घेत त्यांच्यावर खटाव तालुका सचिवपदाची जबाबदारी सोपविण्यात आली आहे.
या नियुक्तीनिमित्त खटाव तालुका पत्रकार संघाच्या वतीने तसेच निमसोड ग्रामस्थांच्या वतीने नितीन राठोड यांचा शाल-श्रीफळ देऊन सत्कार करण्यात आला. यावेळी उपस्थितांनी त्यांना पुढील सामाजिक व पत्रकारितेच्या वाटचालीसाठी शुभेच्छा दिल्या.
नवीन जबाबदारीच्या माध्यमातून जनसामान्यांचे प्रश्न प्रभावीपणे मांडून समाजहितासाठी कार्य करण्याची संधी मिळाल्याची भावना यावेळी व्यक्त करण्यात आली.
