पेपरफुटी आणि स्पर्धा परीक्षा घोटाळ्यांवर मान्यवरांचा संताप; विद्यार्थ्यांच्या न्यायासाठी पारदर्शक परीक्षा व्यवस्थेची मागणी
श्रीगोंदा : प्रतिनिधी
स्पर्धा परीक्षांमधील कथित घोटाळे, वाढत्या पेपरफुटीच्या घटना आणि विद्यार्थ्यांच्या भवितव्याचा प्रश्न यांवर चर्चा करण्यासाठी सखी सन्मति फाउंडेशनच्या वतीने श्रीगोंदा येथील बालाजी मंगल कार्यालयात ‘संवाद विद्यार्थ्यांचा, निर्धार न्यायाचा’ या विशेष मेळाव्याचे आयोजन करण्यात आले होते. या मेळाव्यात व्याख्याते विवेकानंद पाटील, आमदार हेमंत ओगले, उपविभागीय पोलीस अधिकारी (डीवायएसपी) सुजितकुमार क्षीरसागर यांच्यासह विविध क्षेत्रांतील मान्यवरांनी विद्यार्थ्यांशी संवाद साधत परीक्षा व्यवस्थेतील त्रुटी, कथित गैरप्रकार आणि विद्यार्थ्यांसमोरील आव्हानांवर भाष्य केले.
‘बदलाची सुरुवात स्वतःपासून करा’; विवेकानंद पाटील यांचे आवाहन
मुख्य मार्गदर्शक विवेकानंद पाटील यांनी आपल्या भाषणातून राजकीय आणि सामाजिक परिस्थितीवर टीका केली. सरकारपेक्षा जनता हीच लोकशाहीतील खरी शक्ती असल्याचे सांगत त्यांनी नागरिकांनी जागरूक राहण्याचे आवाहन केले. सत्ताधारी आणि विरोधक या दोन्ही बाजूंनी जनतेला गृहीत धरले जात असल्याची टीका त्यांनी केली.
स्पर्धा करताना इतरांशी तुलना करण्याऐवजी स्वतःच्या क्षमतेत सुधारणा करण्यावर भर द्यावा, असेही त्यांनी सांगितले. एमपीएससी परीक्षेतील कथित घोटाळा उघडकीस आणण्यात ऋषिकेश गांगर्डे यांच्यासारख्या तरुणांनी केलेल्या प्रयत्नांचा उल्लेख करून प्रामाणिकपणे प्रश्न उपस्थित करणाऱ्या तरुणांच्या पाठीशी समाजाने उभे राहावे, असे आवाहन त्यांनी केले. दुष्काळाच्या काळात होणाऱ्या वृक्षतोडीबाबत चिंता व्यक्त करत त्यांनी पर्यावरण संवर्धन आणि समाजनिर्मितीचे महत्त्वही अधोरेखित केले.
परीक्षा व्यवस्थेतील गैरप्रकारांवर वक्त्यांनी उपस्थित केले प्रश्न
शरद चाकणे यांनी कथित घोटाळ्यांशी संबंधित दोषी अधिकाऱ्यांवर तातडीने कारवाई करण्याची मागणी केली. अमोल मांडे, पांडुरंग शेलार आणि खरसडे सर यांनी गेल्या पाच वर्षांपासून या प्रकरणाचा पाठपुरावा सुरू असल्याचे सांगितले. दहावी-बारावीतील गुण आणि सीईटी परीक्षेतील गुण यांतील मोठ्या तफावतीबाबत प्रश्न उपस्थित करत परीक्षा प्रक्रियेतील पारदर्शकतेची गरज त्यांनी व्यक्त केली.
एमपीएससी परीक्षेतील कथित घोटाळा उघडकीस आणणारे ऋषिकेश गांगर्डे यांनीही परीक्षा व्यवस्थेतील गैरप्रकारांबाबत चिंता व्यक्त केली. पेपरफुटीमुळे विद्यार्थ्यांचे शैक्षणिक नुकसान होण्याबरोबरच पालकांवर आर्थिक आणि मानसिक ताण निर्माण होत असल्याचे त्यांनी नमूद केले. शीतल धुमाळ, टकले सर आणि किरण निंभोरे यांनीही परीक्षा व्यवस्थेतील कथित भ्रष्टाचाराबाबत आपली मते मांडली.
ऑनलाइन परीक्षांमधील पुराव्यांच्या सुरक्षिततेचा प्रश्न
श्रीरामपूरचे आमदार आणि श्रीगोंद्याचे भूमिपुत्र हेमंत ओगले यांनी ऑनलाइन परीक्षा प्रक्रियेतील तांत्रिक बाबींवर भाष्य केले. ऑनलाइन परीक्षांमध्ये गैरप्रकार झाल्यास डिजिटल पुरावे सुरक्षित ठेवणे आणि त्यांची योग्य तपासणी करणे महत्त्वाचे असल्याचे त्यांनी सांगितले. डेटा हटविणे किंवा पुरावे नष्ट होण्याच्या शक्यतेमुळे तपासात अडचणी निर्माण होऊ शकतात, अशी चिंता त्यांनी व्यक्त केली.
यावेळी विद्यार्थ्यांच्या क्रीडा विकासासाठी प्रशांत ओगले यांनी स्वतःची जागा मैदानासाठी उपलब्ध करून देण्याची घोषणा केली. या घोषणेमुळे विद्यार्थ्यांना क्रीडा उपक्रमांसाठी सुविधा मिळण्याची अपेक्षा व्यक्त करण्यात आली.
‘शिस्त, सातत्य आणि पर्यायी नियोजन महत्त्वाचे’
तहसीलदार सचिन डोंगरे यांनी विद्यार्थ्यांना मार्गदर्शन करताना स्पर्धा परीक्षांमध्ये यश मिळविण्यासाठी शिस्त, सातत्य आणि वेळेचे योग्य नियोजन आवश्यक असल्याचे सांगितले. नियमित अभ्यास आणि नियोजनबद्ध तयारी केल्यास यशाची शक्यता वाढते, असे त्यांनी नमूद केले.
डीवायएसपी सुजितकुमार क्षीरसागर यांनी अभ्यासाचे नियमित सिंहावलोकन करण्याचा आणि अपयश आल्यास त्यातून शिकून पुन्हा प्रयत्न करण्याचा सल्ला दिला. स्पर्धा परीक्षांमध्ये जागा मर्यादित असल्याने विद्यार्थ्यांनी आत्मविश्वास कायम ठेवण्याबरोबरच पर्यायी करिअरचाही विचार करावा, असे त्यांनी सांगितले.
विद्यार्थी, पालक आणि नागरिकांची उपस्थिती
या मेळाव्याला पोलीस निरीक्षक सुभाष सानप, शिक्षक नेते सचिन झगडे, सखी सन्मति फाउंडेशनच्या अध्यक्षा हेमांगी ओगले यांच्यासह तालुक्यातील विद्यार्थी, विद्यार्थिनी, पालक आणि नागरिक मोठ्या संख्येने उपस्थित होते.
कार्यक्रमाचे नियोजन सखी सन्मति फाउंडेशनच्या वतीने करण्यात आले. पत्रकार विशाल चव्हाण यांनी सूत्रसंचालन केले. स्पर्धा परीक्षा प्रक्रियेत पारदर्शकता, विद्यार्थ्यांना न्याय आणि गैरप्रकारांवर प्रभावी कारवाई या मुद्द्यांवर या मेळाव्यातून भर देण्यात आला.
