जिल्हाधिकारी राहुल कर्डिले यांचा खासगी वित्तीय संस्थांना इशारा; शेतकरी आणि कर्जदारांना दिलासा
नांदेड : प्रतिनिधी
नांदेड जिल्ह्यातील दुष्काळी परिस्थितीच्या पार्श्वभूमीवर शेतकरी आणि सर्वसामान्य कर्जदारांना दिलासा देण्यासाठी कर्जवसुली करताना कोणत्याही प्रकारची सक्ती, धमकी किंवा बेकायदेशीर मार्गांचा अवलंब करू नये, असे स्पष्ट निर्देश जिल्हाधिकारी राहुल कर्डिले यांनी दिले आहेत. स्मॉल फायनान्स, मायक्रोफायनान्स आणि इतर खासगी वित्तीय संस्थांनी भारतीय रिझर्व्ह बँकेच्या मार्गदर्शक सूचनांचे काटेकोर पालन करावे, असा इशाराही त्यांनी दिला.
दुष्काळामुळे शेतकरी आणि सर्वसामान्य नागरिक आर्थिक अडचणींचा सामना करत आहेत. अशा परिस्थितीत वित्तीय संस्थांच्या अधिकारी आणि कर्मचाऱ्यांनी कर्जदारांशी सौजन्यपूर्ण व संवेदनशील वर्तन करणे आवश्यक आहे. कर्जवसुलीसाठी मानसिक त्रास देणे, अपमानास्पद वागणूक देणे, धमकावणे, हिंसाचार करणे किंवा गुन्हेगारी पार्श्वभूमीच्या व्यक्तींचा वापर करणे, असे प्रकार सहन केले जाणार नाहीत, असे जिल्हाधिकाऱ्यांनी स्पष्ट केले.
नियमबाह्य वसुली करणाऱ्या संस्थांवर कारवाई
कर्जवसुलीसाठी सिबिल (CIBIL) स्कोअर खराब करण्याची भीती दाखवून दबाव आणणे किंवा नियमबाह्य पद्धतींचा वापर करणे आढळल्यास संबंधित संस्थांविरुद्ध पोलीस आणि जिल्हा प्रशासनामार्फत कायद्यानुसार कठोर कारवाई करण्यात येईल. अशा प्रकरणांमध्ये लागू कायदेशीर तरतुदींनुसार दंडात्मक तसेच आवश्यकतेनुसार फौजदारी कारवाई केली जाईल, असे बैठकीत स्पष्ट करण्यात आले.
क्षेत्रीय अधिकाऱ्यांना देखरेखीचे निर्देश
तहसीलदार, सहाय्यक निबंधक आणि सहकार विभागातील संबंधित अधिकाऱ्यांनी स्थानिक पोलीस प्रशासनाच्या समन्वयाने वित्तीय संस्थांच्या कर्जवसुली प्रक्रियेवर नियमित लक्ष ठेवावे, असे निर्देश देण्यात आले आहेत. अनधिकृत वसुली, कर्जदारांना धमकावणे किंवा संशयास्पद व्यवहार आढळल्यास तातडीने पडताळणी करून संबंधितांवर कायद्यानुसार कारवाई करावी. तसेच केलेल्या कार्यवाहीचा नियमित आढावा घेऊन अहवाल सादर करण्याच्या सूचनाही जिल्हाधिकाऱ्यांनी दिल्या.
कर्जदारांच्या सन्मानाचे आणि हक्कांचे संरक्षण करा
कर्जवसुली करताना वित्तीय संस्थांनी लागू नियमांचे पालन करून कर्जदारांच्या सन्मानाचे आणि कायदेशीर हक्कांचे संरक्षण करणे आवश्यक आहे. दुष्काळी परिस्थितीचा गैरफायदा घेऊन शेतकरी व सर्वसामान्य नागरिकांना त्रास देणाऱ्या संस्थांविरुद्ध प्रशासन कठोर भूमिका घेणार असल्याचे जिल्हाधिकारी राहुल कर्डिले यांनी स्पष्ट केले.
या बैठकीस अपर जिल्हाधिकारी डॉ. रत्नदीप गायकवाड, अपर पोलीस अधीक्षक सूरज गुरव, जिल्हा उपनिबंधक शाहूराज हिरे, जिल्हा अग्रणी बँकेचे व्यवस्थापक बी. जी. सोनकांबळे यांच्यासह संबंधित विभागांचे अधिकारी उपस्थित होते.
