“डॉ. प्रमोद गारोडे हे साहित्याला वाहून घेतलेले व्यक्तिमत्त्व”; प्रा. अरुण बुंदेले यांचे गौरवोद्गार
अमरावती : प्रतिनिधी
साहित्य क्षेत्रातील उल्लेखनीय योगदानाबद्दल सुप्रसिद्ध साहित्यिक प्रा. डॉ. प्रमोद भीमराव गारोडे आणि त्यांच्या साहित्यिक कार्याला सातत्याने प्रोत्साहन देणाऱ्या त्यांच्या पत्नी प्रा. डॉ. सौ. चित्रा गारोडे यांचा कै. मैनाबाई बाबारावजी बुंदेले स्मृती प्रतिष्ठान, अमरावती यांच्या वतीने सपत्नीक सत्कार करण्यात आला. रविवार, दि. २५ ऑक्टोबर २०२६ रोजी परतवाडा येथील कमलकुंज, गोवर्धन विहार येथे हा कार्यक्रम पार पडला.
प्रतिष्ठानचे अध्यक्ष प्रा. अरुण बाबारावजी बुंदेले आणि समाजसेवक व वऱ्हाडी कवी डॉ. राजा धर्माधिकारी यांच्या हस्ते शाल, पुष्पगुच्छ, सन्मानपत्र तसेच प्रा. बुंदेले लिखित अभंग तरंग, निखारा, आदर्श अभ्यासाचे तंत्र आणि दारूनं मेला ओ माय ही पुस्तके भेट देऊन गारोडे दाम्पत्याचा सन्मान करण्यात आला.
‘साहित्याला स्वतःला वाहून घेतलेले व्यक्तिमत्त्व’ — प्रा. अरुण बुंदेले
कार्यक्रमाच्या अध्यक्षस्थानावरून बोलताना प्रा. अरुण बुंदेले यांनी डॉ. प्रमोद गारोडे यांच्या साहित्यिक आणि शैक्षणिक कार्याचा गौरव केला. डॉ. गारोडे यांचे सात काव्यसंग्रह, बारा समीक्षाग्रंथ, पंचवीस संपादित ग्रंथ आणि एक कथासंग्रह असे एकूण ४५ ग्रंथ प्रकाशित झाल्याचे त्यांनी सांगितले.
डॉ. गारोडे हे परतवाडा येथील बी. एस. पाटील महाविद्यालयात प्राध्यापक असून पदव्युत्तर मराठी विभागाचे प्रमुख म्हणून कार्यरत आहेत. मराठी विषयात विविध नावीन्यपूर्ण उपक्रम आणि प्रकल्पांच्या माध्यमातून विद्यार्थ्यांना घडविण्याचे काम ते करीत आहेत, असे प्रा. बुंदेले यांनी नमूद केले.
डॉ. गारोडे यांना डॉ. आंबेडकर इंटरनॅशनल साहित्य पुरस्कार, कॅनडा, मि. ग. रोहमारे ग्रामीण साहित्य पुरस्कार आणि विदर्भ साहित्य संघाच्या पुरस्कारांसह विविध साहित्यिक व सामाजिक संस्थांकडून ५६ साहित्य पुरस्कारांनी सन्मानित करण्यात आले आहे. नुकताच महाराष्ट्र शासनाच्या उच्च व तंत्र शिक्षण विभागाचा ‘डॉ. जे. पी. नाईक आदर्श राज्य शिक्षक पुरस्कार’ त्यांना नामदार चंद्रकांतदादा पाटील यांच्या हस्ते प्रदान करण्यात आला.
यापूर्वी त्यांना पद्मश्री डॉ. मणिभाई देसाई बेस्ट टीचर अवॉर्ड (२०१४), राज्यस्तरीय आदर्श शिक्षक पुरस्कार (२०१५), डॉ. बाबासाहेब आंबेडकर आदर्श शिक्षक पुरस्कार (२०१५) आणि आदर्श शिक्षक पुरस्कार गौरवपत्र असे अनेक सन्मान प्राप्त झाले आहेत. तसेच अंकुर साहित्य संघ, अकोला यांच्या वतीने साहित्य क्षेत्रातील उल्लेखनीय कार्याबद्दल त्यांना ‘अंकुर जीवन गौरव पुरस्कार’ प्रदान करण्यात आला आहे.
महाराष्ट्र शासनाच्या लोकशाहीर अण्णाभाऊ साठे चरित्र साधने प्रकाशन समितीचे सदस्य म्हणूनही ते कार्यरत आहेत. अण्णाभाऊ साठे यांच्या जीवनावरील खंडांच्या संपादनात त्यांनी योगदान दिले आहे. तसेच राज्य मराठी अभ्यास मंडळ आणि बालभारती, पुणे यांच्याशी संबंधित कार्यातही त्यांचा सहभाग आहे. विविध सामाजिक, शैक्षणिक आणि साहित्यिक विषयांवर त्यांनी महाराष्ट्रभर २०० हून अधिक व्याख्याने दिली असून राष्ट्रीय व आंतरराष्ट्रीय चर्चासत्रे आणि साहित्य संमेलनांमध्ये निमंत्रित वक्ता म्हणून सहभाग घेतला आहे. अशा बहुआयामी साहित्यिकाचा सन्मान करताना आनंद होत असल्याचे प्रा. बुंदेले यांनी सांगितले.
‘डॉ. गारोडे हे चतुरंग व्यक्तिमत्त्वाचे धनी’ — डॉ. राजा धर्माधिकारी
कार्यक्रमाचे प्रमुख अतिथी सुप्रसिद्ध वऱ्हाडी कवी डॉ. राजा धर्माधिकारी यांनी डॉ. प्रमोद गारोडे यांच्या बहुआयामी व्यक्तिमत्त्वाचे कौतुक केले. संशोधनाधिष्ठित आणि समाजोपयोगी साहित्यनिर्मिती करणारे डॉ. गारोडे यांनी तुलनेने कमी वयात मोठी ग्रंथसंपदा निर्माण केली आहे. शैक्षणिक आणि साहित्यिक क्षेत्रातील त्यांचे योगदान उल्लेखनीय असल्याचे त्यांनी नमूद केले.
साहित्यिक व अभंगकार प्रा. अरुण बुंदेले यांनी आपल्या मातोश्रींच्या स्मृती जपताना प्रतिष्ठानच्या माध्यमातून साहित्यिकांचा सन्मान करण्याचा उपक्रम राबविला, ही आनंदाची बाब असल्याचे डॉ. धर्माधिकारी म्हणाले. या उपक्रमाला शुभेच्छा देत त्यांनी सत्कारमूर्तींचे अभिनंदन केले.
‘सत्कारामुळे नव्या लेखनाची ऊर्जा मिळाली’ — डॉ. प्रमोद गारोडे
सत्काराला उत्तर देताना प्रा. डॉ. प्रमोद गारोडे यांनी कै. मैनाबाई बुंदेले स्मृती प्रतिष्ठानच्या सन्मानाबद्दल कृतज्ञता व्यक्त केली. या सत्कारामुळे नव्याने लेखन करण्याची ऊर्जा मिळाल्याचे त्यांनी सांगितले.
आईच्या नावाने स्थापन केलेल्या प्रतिष्ठानच्या माध्यमातून प्रा. बुंदेले यांनी आपल्या साहित्यिक कार्याचा गौरव केल्याने आपण भारावून गेलो असल्याचे ते म्हणाले. सत्कारावेळी पांघरलेल्या शालीतील प्रेम आणि मायेची ऊब आयुष्यभर सोबत राहील, असे भावपूर्ण उद्गार त्यांनी काढले. आई-वडिलांच्या स्मृती जतन करण्याचे प्रा. बुंदेले यांचे कार्य प्रेरणादायी असल्याचेही त्यांनी नमूद केले.
यावेळी प्रा. डॉ. प्रमोद गारोडे यांनी स्वतःलिखित पुस्तके भेट देऊन प्रा. अरुण बुंदेले आणि डॉ. राजा धर्माधिकारी यांचाही सन्मान केला. अनेक साहित्यिक मित्रांनी ऑनलाइन माध्यमातून डॉ. गारोडे यांचे अभिनंदन केले. अल्पोपहाराने कार्यक्रमाची सांगता झाली.
