नवीन इमारतीच्या बांधकामाचा मार्ग मोकळा; बसफेऱ्या आणि मुक्काम सुरू ठेवत प्रवाशांची गैरसोय टाळण्याचा प्रयत्न
सातारा : सातारा बसस्थानकाच्या नूतनीकरणातील महत्त्वाचा टप्पा अखेर गाठला जाणार आहे. नवीन इमारतीच्या बांधकामात अडथळा ठरणारी जुनी इमारत २७ ऑक्टोबरपासून पाडण्यात येणार आहे. पर्यायी व्यवस्थेतील अडचणी आणि विविध कारणांमुळे रखडलेल्या या कामाला अखेर मुहूर्त मिळाला आहे. पाडकामाच्या पार्श्वभूमीवर बसस्थानक परिसरात सुरक्षिततेच्या दृष्टीने बॅरिकेडिंग, संरक्षक जाळी आणि पत्रे लावण्याचे काम हाती घेण्यात आले आहे.
सातारा हे जिल्ह्याचे मुख्यालय असल्याने येथील बसस्थानकावर दररोज मोठ्या संख्येने प्रवाशांची वर्दळ असते. जिल्ह्यातील ग्रामीण भागासह विविध शहरांना जोडणाऱ्या या बसस्थानकाची जुनी इमारत जीर्ण झाली होती. त्यामुळे बसस्थानकाचा विकास करून ते अधिक प्रशस्त आणि सुसज्ज करावे, अशी मागणी प्रवासी संघटनांकडून वारंवार करण्यात येत होती. स्थानिक लोकप्रतिनिधींनीही यासाठी पाठपुरावा केला होता.
खासदार उदयनराजे भोसले आणि राज्याचे सार्वजनिक बांधकाम मंत्री शिवेंद्रसिंहराजे भोसले यांनी शासनाकडे केलेल्या पाठपुराव्यानंतर नवीन इमारतीच्या उभारणीला मंजुरी मिळाली आहे. त्यामुळे जुन्या इमारतीच्या पाडकामानंतर नवीन बसस्थानकाच्या बांधकामाला प्रत्यक्ष सुरुवात होण्याचा मार्ग मोकळा झाला आहे. याबाबत एसटीच्या विभागीय कार्यालयातून माहिती देण्यात आली आहे.
बसफेऱ्या आणि मुक्काम सुरू राहणार
जुन्या इमारतीचे पाडकाम सुरू असताना प्रवाशांची सुरक्षितता आणि वाहतूक व्यवस्था सुरळीत ठेवण्यावर एसटी प्रशासनाचा भर आहे. कोणत्याही गावाची बसफेरी किंवा मुक्काम बंद न करता प्रवाशांची गैरसोय टाळण्यासाठी आवश्यक ती खबरदारी घेतली जात असल्याचे प्रशासनाने स्पष्ट केले आहे.
बसस्थानकाच्या नूतनीकरणामुळे प्रवाशांना भविष्यात अधिक प्रशस्त आणि सुसज्ज सुविधा उपलब्ध होण्याची अपेक्षा आहे. पाडकामाच्या काळात प्रवाशांनी सुरक्षिततेच्या सूचनांचे पालन करावे आणि प्रशासनाला सहकार्य करावे, असे आवाहन करण्यात येत आहे.
