धानपिकाची पाहणी करण्यासाठी शेतात गेलेल्या शांताराम मडावी यांच्यावर वाघाचा हल्ला; मानव-वन्यजीव संघर्षामुळे शेतकरी वर्गात भीतीचे वातावरण
गडचिरोली : धानपिकाची पाहणी करण्यासाठी शेतात गेलेल्या २६ वर्षीय शेतकऱ्याचा वाघाच्या हल्ल्यात मृत्यू झाल्याची दुर्दैवी घटना धानोरा तालुक्यातील तुडमेल येथे मंगळवारी (२७ ऑक्टोबर) घडली. शांताराम मनू मडावी असे मृत शेतकऱ्याचे नाव आहे. या घटनेमुळे तुडमेल गावावर शोककळा पसरली असून, जिल्ह्यातील मानव-वन्यजीव संघर्षाचा प्रश्न पुन्हा ऐरणीवर आला आहे.
मिळालेल्या माहितीनुसार, शांताराम मडावी हे मंगळवारी सकाळी सुमारे अकरा वाजता धानपिकाची पाहणी करण्यासाठी शेतात गेले होते. मात्र, बराच वेळ होऊनही ते घरी परतले नाहीत. त्यामुळे त्यांच्या पत्नीने दुपारी सुमारे तीन वाजता शेताकडे धाव घेतली. यावेळी वनक्षेत्रातील कंपार्टमेंट क्रमांक ३०५ मध्ये वाघाच्या हल्ल्यात शांताराम यांचा मृत्यू झाल्याचे उघड झाले. घटनेचा तपास पोलीस उपनिरीक्षक अजय कोर्डे करीत आहेत.
आठ दिवसांत दुसरा बळी; परिसरात भीतीचे वातावरण
धानोरा तालुक्यात वाघांच्या हल्ल्यांच्या घटनांमध्ये वाढ होत असल्याने परिसरातील नागरिकांमध्ये भीतीचे वातावरण निर्माण झाले आहे. आठ दिवसांपूर्वी इरपनार येथील बिलाशी आनंद बाला या महिलेचा वाघाच्या हल्ल्यात मृत्यू झाला होता. त्यानंतर दोन दिवसांपूर्वी याच परिसरात वाघाने एका बैलासह गायीवर हल्ला करून त्यांना ठार केल्याची घटना घडली होती. या घटनांनंतर तुडमेल येथील तरुण शेतकऱ्याचा मृत्यू झाल्याने नागरिकांच्या चिंतेत आणखी भर पडली आहे.
शेती करायची तरी कशी? शेतकऱ्यांसमोर सुरक्षेचा प्रश्न
गडचिरोली जिल्ह्यातील अनेक गावांमध्ये शेती आणि जंगलालगतच्या क्षेत्रांचा जवळचा संबंध आहे. धान कापणीचा हंगाम जवळ येत असताना पिकांची पाहणी, राखण आणि इतर शेतीकामांसाठी शेतकऱ्यांना वारंवार शेतात जावे लागते. मात्र, वाघांच्या हल्ल्यांचा वाढता धोका पाहता शेतीची कामे करतानाही शेतकरी आणि शेतमजुरांना जीव मुठीत धरून वावरावे लागत आहे.
वनविभागाने प्रतिबंधात्मक उपाययोजना कराव्यात
वारंवार घडणाऱ्या या घटनांमुळे वनविभागाच्या प्रतिबंधात्मक उपाययोजनांबाबत प्रश्न उपस्थित होत आहेत. वाघांच्या हालचालींवर प्रभावी देखरेख ठेवणे, संभाव्य धोकादायक क्षेत्रातील नागरिकांना वेळेत सूचना देणे, वनक्षेत्रात गस्त वाढविणे आणि मानव-वन्यजीव संघर्ष कमी करण्यासाठी ठोस उपाययोजना करणे आवश्यक आहे.
घटना घडल्यानंतर मदत देण्याबरोबरच संभाव्य जीवितहानी रोखण्यासाठी वनविभागाने तातडीने प्रतिबंधात्मक पावले उचलावीत, अशी मागणी परिसरातील नागरिकांकडून होत आहे.
