सकल कुंभार समाज विकास परिषदेचे प्रदेशाध्यक्ष संजय गाते यांचा विश्वास; पारंपरिक व्यवसायाच्या प्रश्नांवर वर्ध्यात प्रदेश कार्यकारिणीच्या बैठकीत चर्चा
अकोट | प्रतिनिधी: महाराष्ट्रातील कुंभार समाजासाठी भाजपा सरकार लवकरच श्रीसंत शिरोमणी गोरोबा काका माती कला बोर्ड कार्यान्वित करून समाजाला न्याय देईल, असा विश्वास सकल कुंभार समाज विकास परिषदेचे प्रदेशाध्यक्ष तथा भाजपा वर्धा जिल्हाध्यक्ष संजय गाते यांनी व्यक्त केला. मंगळवार, दि. २७ ऑक्टोबर २०२६ रोजी वर्धा येथे आयोजित परिषदेच्या प्रदेश कार्यकारिणीच्या बैठकीत ते बोलत होते.
राज्य सरकारने कुंभार समाजासाठी ७०० ब्रासपर्यंत रॉयल्टी माफीसंदर्भातील परिपत्रक जारी केल्याने समाजाच्या पारंपरिक व्यवसायाला चालना मिळेल, असे गाते यांनी सांगितले. या निर्णयाबद्दल त्यांनी शासनाचे आभार मानले. आगामी काळात माती कला बोर्डाच्या स्थापनेसह कुंभार समाजाच्या विविध प्रलंबित प्रश्नांवर सकारात्मक निर्णय होतील, असा विश्वासही त्यांनी व्यक्त केला.
ग्रामीण भागातील कुंभार व्यावसायिकांना माफक दरात इंधन उपलब्ध करून देणे, तेर तीर्थक्षेत्राच्या विकासासाठी आराखडा तयार करणे आणि राज्यातील पारंपरिक व्यवसाय करणाऱ्यांना व्यवसायासाठी जागा उपलब्ध करून देणे, या मागण्यांचाही त्यांनी उल्लेख केला. सकल कुंभार समाज विकास परिषदेच्या माध्यमातून समाजाच्या सर्वांगीण विकासासाठी कटिबद्ध असल्याचे त्यांनी स्पष्ट केले.
१५ नोव्हेंबरला पुण्यात राज्यस्तरीय बैठक
सकल कुंभार समाज विकास परिषदेची प्रदेश कार्यकारिणी बैठक वर्धा येथील हरिराम टॉवर, मुरारका लॉन्स येथे संजय गाते यांच्या अध्यक्षतेखाली पार पडली. या बैठकीत आगामी १५ नोव्हेंबर २०२६ रोजी आळा फाटा, पुणे येथे राज्यातील पदाधिकारी आणि कार्यकर्त्यांची विस्तृत बैठक आयोजित करण्यात आल्याची माहिती देण्यात आली.
या आगामी बैठकीचे नियोजन, चर्चेचे विषय, संघटनात्मक बांधणी आणि परिषदेच्या पुढील कार्यक्रमांबाबत सविस्तर चर्चा करण्यात आली. राज्यातील कुंभार समाजाच्या प्रश्नांवर संघटितपणे पाठपुरावा करण्यावरही भर देण्यात आला.
गोरोबा काकांच्या प्रतिमापूजनाने कार्यक्रमाची सुरुवात
कार्यक्रमाच्या प्रारंभी श्रीसंत शिरोमणी गोरोबा काका यांच्या प्रतिमेचे पूजन आणि दीपप्रज्वलन करण्यात आले. परिषदेचे प्रमुख सरचिटणीस सुभाष तेटवार यांनी प्रास्ताविकातून कार्यक्रमाची रूपरेषा आणि आगामी काळातील परिषदेची वाटचाल स्पष्ट केली. प्रदेश सरचिटणीस उत्तमराव मांजरमकर यांनी सूत्रसंचालन केले, तर वर्धा जिल्हाध्यक्ष वसंतराव जवळेकर यांनी आभार मानले.
यावेळी महाराष्ट्रातील विविध जिल्ह्यांतील पदाधिकाऱ्यांची जिल्हाध्यक्षपदी निवड करून त्यांना नियुक्तीपत्रे देण्यात आली. बैठकीला रमेशराव बुरबांदे, संपादक दिलीप खांडेकर, कारेगावकर, बबन लोणारे, अविनाश ठाकरे, संजय वाडकर, गणपतराव शेवाळकर, पुंडलिकराव रांजणे, ओमप्रकाश पांडे, राकेश प्रजापती, गणेश मोरे, किरणताई लंगोटे, राजाभाऊ सोनेने, अतुल वाडकर, विजय प्रजापती, आकाश संत्रे, अशोक सोनेने, ॲड. हरीष मंचलवार, अशोक चिरखरे, बबलू जुगेले, डेरे पाटील, अनिल गरपल्लीवार आणि संतोष कनोजे यांच्यासह राज्यातील प्रमुख पदाधिकारी व विविध जिल्ह्यांचे जिल्हाध्यक्ष उपस्थित होते.
वर्धा जिल्ह्यातील पदाधिकाऱ्यांनी बैठकीचे नेटके नियोजन केल्याबद्दल उपस्थितांनी त्यांचे कौतुक केले. राष्ट्रगीताने कार्यक्रमाची सांगता झाली.
