कर्णकर्कश आवाजाच्या बुलेट, काळ्या फिल्मच्या काचा, हेल्मेट व सीटबेल्ट न वापरणाऱ्यांवर वाहतूक शाखेचा दणका
लोणावळा | प्रतिनिधी : लोणावळा परिसरात वाहतूक नियमांचे उल्लंघन करणाऱ्या वाहनचालकांविरुद्ध लोणावळा ग्रामीण वाहतूक शाखेने विशेष मोहीम राबवली. या मोहिमेदरम्यान विविध नियमांचे उल्लंघन करणाऱ्या ५१ वाहनचालकांवर कारवाई करण्यात आली असून, एकूण ४८ हजार ४०० रुपयांचा दंड आकारण्यात आला आहे.
या कारवाईत कर्णकर्कश आवाज करणाऱ्या बुलेट मोटारसायकली, वाहनांच्या काचांवर अनधिकृत काळी फिल्म लावणे, दुचाकी चालवताना हेल्मेट न वापरणे तसेच चारचाकी वाहन चालवताना सीटबेल्ट न लावणे अशा नियमभंगाच्या प्रकारांवर विशेष लक्ष केंद्रित करण्यात आले.
वाहतूक नियमांचे पालन सुनिश्चित करणे, रस्त्यांवरील शिस्त कायम ठेवणे, ध्वनिप्रदूषणाला आळा घालणे आणि वाहनचालकांसह नागरिकांची सुरक्षितता वाढवणे हा या मोहिमेचा उद्देश होता.
वरिष्ठ अधिकाऱ्यांच्या मार्गदर्शनाखाली कारवाई
लोणावळा उपविभागाचे उपविभागीय पोलीस अधिकारी गजानन टोणापे यांच्या मार्गदर्शनाखाली ही कारवाई करण्यात आली. यामध्ये पोलीस उपअधीक्षक भूषण माने, सहाय्यक पोलीस निरीक्षक विजया मुळे, पोलीस हवालदार भूषण कदम व विनोद गवरी, पोलीस कॉन्स्टेबल सतीश कुंदे व यश देसाई तसेच पोलीस मित्र अनिल लोंढे, विनोद विकारी, विक्रम येवले आणि वाजे यांनी सहभाग घेतला.
वाहतूक नियमांचे पालन करण्याचे आवाहन
लोणावळा ग्रामीण वाहतूक शाखेने सर्व वाहनचालकांना वाहतुकीचे नियम काटेकोरपणे पाळण्याचे आवाहन केले आहे. दुचाकी चालवताना हेल्मेटचा, तर चारचाकी वाहन चालवताना सीटबेल्टचा वापर करावा. वाहनांच्या काचांवर अनधिकृत काळी फिल्म लावू नये आणि कर्णकर्कश आवाज करणाऱ्या सायलेन्सरचा वापर टाळावा, असे आवाहन करण्यात आले आहे.
वाहतूक नियमांचे उल्लंघन करणाऱ्यांविरुद्ध यापुढेही कायदेशीर कारवाई सुरू राहणार असल्याचा इशारा वाहतूक शाखेने दिला आहे.
वाहतूक नियम पाळा, स्वतः सुरक्षित राहा आणि इतरांच्याही सुरक्षिततेची काळजी घ्या!
