पाणीटंचाईने ग्रामस्थ त्रस्त; मागण्या मान्य न झाल्यास आंदोलनाचा इशारा
पाथर्डी | प्रतिनिधी :
दुष्काळी परिस्थितीमुळे पाथर्डी तालुक्यातील निवडुंगे गावात नागरिकांसह जनावरांच्या पाण्याचा प्रश्न गंभीर झाला आहे. त्यामुळे जनावरांसाठी चारा डेपो सुरू करावा आणि वाड्या-वस्त्यांवर पिण्याच्या पाण्यासाठी टँकर सुरू करावेत, अशी मागणी ग्रामस्थांनी तहसीलदारांकडे निवेदनाद्वारे केली आहे.
जल जीवन मिशनअंतर्गत पाथर्डी येथून निवडुंगे गावापर्यंत नवीन पाइपलाइनचे काम सुरू करण्याची मागणीही करण्यात आली आहे. मागण्या मान्य न झाल्यास आंदोलन करण्याचा इशारा ग्रामस्थांनी दिला आहे. निवेदनाच्या प्रती जिल्हाधिकारी, गटविकास अधिकारी आणि पोलीस प्रशासनालाही देण्यात आल्या आहेत.
या निवेदनावर आसाराम ससे, आकाश शिंदे, सोमनाथ शिरसाट, अशोक मरकड, भाऊसाहेब ढवळे, विठ्ठल मरकड, बापू गोसावी, सूर्यकांत मरकड, नवनाथ जाधव, किशोर बोरसे यांच्यासह ग्रामस्थांच्या स्वाक्षऱ्या आहेत.
