चार दिवसांत ठोस निर्णय न झाल्यास साखर कारखाने बंद पाडण्याचा जनहित शेतकरी संघटनेचा इशारा
सोलापूर : सोलापूर जिल्ह्यातील साखर कारखान्यांचा गळीत हंगाम सुरू होऊन १७ दिवस उलटले असतानाही ऊसदर जाहीर करण्यात आलेला नसल्याचा आरोप महाराष्ट्र राज्य जनहित शेतकरी संघटनेने केला आहे. ऊस उत्पादक शेतकऱ्यांना चालू हंगामासाठी प्रतिटन ४,२०० रुपये दर तातडीने जाहीर करावा, अशी मागणी संघटनेने केली आहे.
या मागणीसंदर्भात संघटनेचे संस्थापक अध्यक्ष प्रभाकर देशमुख यांनी सोलापूर विभागाचे साखर उपसंचालक नानासाहेब रुपनर यांची साखर सहसंचालक कार्यालयात भेट घेऊन निवेदन दिले. तसेच सोलापूरचे निवासी जिल्हाधिकारी अभिजीत पाटील यांनाही निवेदन सादर करण्यात आले.
ऊसदर निश्चित न करताच साखर कारखाने सुरू करण्यात आल्याच्या प्रकारात शासनाने तातडीने हस्तक्षेप करावा, अशी मागणी निवेदनातून करण्यात आली आहे. सहकारमंत्री बाबासाहेब पाटील यांनी ऊसदराच्या प्रश्नावर आपली जबाबदारी पार पाडावी. शेतकऱ्यांना न्याय देणे शक्य नसल्यास त्यांनी सहकारमंत्रिपदाचा राजीनामा द्यावा, अशी मागणीही संघटनेने केली आहे.
गतवर्षीची थकीत ऊसबिले तातडीने अदा करावीत आणि चालू गळीत हंगामासाठी योग्य ऊसदर निश्चित करावा, असेही निवेदनात नमूद करण्यात आले आहे.
चार दिवसांचा अल्टिमेटम
येत्या चार दिवसांत ऊसदर जाहीर करण्याबाबत ठोस निर्णय न झाल्यास गव्हाणीत उड्या घेऊन साखर कारखाने बंद पाडण्याचा इशारा संघटनेने दिला आहे. त्यामुळे ऊसदराच्या प्रश्नावर आगामी काळात आंदोलन तीव्र होण्याची शक्यता आहे.
निवेदन देताना महाराष्ट्र राज्य जनहित शेतकरी संघटनेचे संस्थापक अध्यक्ष प्रभाकर देशमुख, सुभाष पवार, धोंडोपंत पाटील, रमेश निंबर्गी, पिंटू पवार, गोवर्धन घोलफ, विजय नरुटे आणि जक्काप्पा शेजाळे आदी उपस्थित होते.
