निर्णयाचे शिवप्रेमींकडून जल्लोषात स्वागत; घोषणांनी नगरपरिसर दुमदुमला
अमळनेर : अमळनेर नगरपरिषदेच्या दि. २९ रोजी झालेल्या सर्वसाधारण सभेत धुळे रोडवरील मुख्य प्रवेशद्वाराला ‘छत्रपती शिवाजी महाराज प्रवेशद्वार’ असे नाव देण्याचा ठराव सत्ताधारी आणि विरोधी सदस्यांनी एकमताने मंजूर केला. या निर्णयामुळे शहरातील शिवप्रेमींमध्ये आनंदाचे वातावरण निर्माण झाले असून, नगरपरिषदेत उपस्थित राहून शिवप्रेमींनी जल्लोषात या निर्णयाचे स्वागत केले.
‘छत्रपती शिवाजी महाराज की जय’, ‘जय भवानी, जय शिवराय’ अशा गगनभेदी घोषणांनी नगरपरिसर दुमदुमून गेला. यावेळी नगराध्यक्ष डॉ. परीक्षित बाविस्कर, उपनगराध्यक्ष प्रशांत निकम आणि मुख्याधिकारी गणेश शिंदे यांना पेढे भरवून तसेच फटाक्यांची आतषबाजी करून शिवप्रेमींनी आनंदोत्सव साजरा केला.
छत्रपती शिवाजी महाराज हे महाराष्ट्राचे आराध्य दैवत असून, त्यांच्या नावाने अमळनेर शहराच्या मुख्य प्रवेशद्वाराची ओळख निर्माण होणे ही शिवप्रेमी आणि शिवभक्तांसाठी अभिमानाची बाब असल्याची भावना यावेळी व्यक्त करण्यात आली. सत्ताधारी व विरोधी सदस्यांनी ठरावाला एकमताने मंजुरी दिल्याने शिवप्रेमींनी समाधान व्यक्त केले.
या आनंदोत्सवाप्रसंगी योगेंद्र बाविस्कर, भरत पवार, शुभम पाटील, उज्ज्वल पाटील, अनिरुद्ध शिसोदे, सागर विसपुते, राहुल कंजर, राहुल बडगुजर, अथर्व डेरे, राकेश शेटे, निनाद जोशी, राहुल अहिरे, भागवत पाटील, गणेश पाटील, गोकुळ पाटील, शाम पाटील, मनोज शिंगाणे, चिराग पाटील आदी शिवप्रेमी उपस्थित होते.
