पुणे जिल्ह्यातील संभाव्य दुष्काळी परिस्थितीचा उपमुख्यमंत्री सुनेत्रा पवार यांच्याकडून आढावा

पिण्याचे पाणी, चारा उत्पादन आणि जलसंधारणाच्या कामांना प्राधान्य; सर्व यंत्रणांना समन्वयाने काम करण्याचे निर्देश

पुणे : प्रतिनिधी : पुणे जिल्ह्यातील संभाव्य दुष्काळी परिस्थितीचा सामना करण्यासाठी पिण्याच्या पाण्याचे योग्य नियोजन, पशुधनासाठी चाऱ्याची उपलब्धता, जलसंधारणाची कामे आणि टंचाई निवारणाच्या उपाययोजनांची प्रभावी अंमलबजावणी करावी. प्रशासनातील सर्व विभागांनी समन्वयाने काम करून नागरिकांना वेळेत मदत उपलब्ध करून द्यावी, असे निर्देश उपमुख्यमंत्री तथा पुणे जिल्ह्याच्या पालकमंत्री सुनेत्रा पवार यांनी दिले.

विभागीय आयुक्त कार्यालय, पुणे येथे आयोजित आढावा बैठकीत त्या बोलत होत्या. यावेळी जिल्हा परिषदेचे अध्यक्ष वीरधवल जगदाळे, महापौर मंजुषा नागापुरे, खासदार सुप्रिया सुळे, आमदार विजय शिवतारे, राहुल कुल, शंकर मांडेकर, बाबाजी काळे, उपमुख्यमंत्री कार्यालयाचे सचिव डॉ. राजेश देशमुख, जिल्हाधिकारी जितेंद्र डुडी, जिल्हा परिषदेचे मुख्य कार्यकारी अधिकारी गजानन पाटील, निवासी उपजिल्हाधिकारी ज्योती कदम यांच्यासह विविध लोकप्रतिनिधी आणि अधिकारी उपस्थित होते.

पिण्याच्या पाण्याच्या नियोजनाला प्राधान्य

बैठकीत जिल्ह्यातील पिण्याच्या पाण्याच्या उपलब्धतेचा आढावा घेण्यात आला. राखीव पाण्याचा वापर नियोजनानुसार करण्याच्या सूचना देण्यात आल्या. ग्रामीण भागात आवश्यकतेनुसार टँकरद्वारे पाणीपुरवठा करावा. रब्बी हंगामातील पिकांसाठी पाण्याचे नियोजन करताना पिण्याच्या पाण्याला प्राधान्य द्यावे, असे निर्देश सुनेत्रा पवार यांनी दिले.

चारा उत्पादन आणि जलसंधारणावर भर

दुष्काळी परिस्थितीत पशुधनासाठी चारा उपलब्ध व्हावा, यासाठी चारा लागवड प्रकल्प राबविण्यात येत आहे. शेतकऱ्यांना चारा पिकांचे बियाणे उपलब्ध करून देण्याचे नियोजन करण्यात येत असून, कमी पाण्यात येणाऱ्या चारा पिकांच्या लागवडीला प्रोत्साहन देण्याच्या सूचनाही देण्यात आल्या.

जलसंधारणाची कामे मोठ्या प्रमाणावर हाती घेऊन पाण्याचे स्रोत बळकट करावेत. जिल्हा नियोजन समितीच्या माध्यमातून आवश्यक कामांसाठी निधी उपलब्ध करून देण्याबाबत कार्यवाही करावी, असेही त्यांनी सांगितले. नगरपरिषद क्षेत्रांसह ग्रामीण भागातील पाणीपुरवठ्याचे नियोजन अधिक प्रभावी करण्यावर बैठकीत भर देण्यात आला.

स्थलांतराच्या शक्यतेच्या पार्श्वभूमीवर प्रशासन सतर्क

दुष्काळी परिस्थितीमुळे नागरिकांचे स्थलांतर होण्याची शक्यता लक्षात घेऊन प्रशासनाने आवश्यक खबरदारी घ्यावी. शासकीय योजनांची अंमलबजावणी वेळेत करून बाधित नागरिकांना तातडीने मदत उपलब्ध करून द्यावी. यासाठी सर्व विभागांनी परस्पर समन्वय राखून काम करावे, असे निर्देश उपमुख्यमंत्री सुनेत्रा पवार यांनी दिले.