राख तातडीने हटवून कंपनीवर कारवाई करा; अन्यथा जिल्हाधिकारी व प्रांताधिकारी कार्यालयात राख टाकण्याचा पीपल्स रिपब्लिकन पार्टीचा इशारा
सातारा–वाई : प्रतिनिधी : कृष्णा नदीपात्रापासून अवघ्या शंभर फूट अंतराच्या आत केमिकलयुक्त राख टाकल्याचा आरोप करत वाई एमआयडीसीमधील अथर्व फाउंड्री कंपनीवर तातडीने कारवाई करण्याची मागणी पीपल्स रिपब्लिकन पार्टीने केली आहे. कंपनी सील करून नदीपात्राजवळ टाकलेली राख तातडीने हटवावी, अन्यथा ही राख जिल्हाधिकारी कार्यालय, सातारा आणि उपविभागीय अधिकारी कार्यालय, वाई येथे आणून टाकण्यात येईल, असा इशारा पक्षाने निवेदनाद्वारे प्रशासनाला दिला आहे.
दि. २९ ऑक्टोबर रोजी पीपल्स रिपब्लिकन पार्टीच्या वतीने जिल्हाधिकारी, सातारा आणि उपविभागीय अधिकारी, वाई यांना यासंदर्भात निवेदन देण्यात आले. वाई एमआयडीसी परिसरात असलेल्या अथर्व फाउंड्री कंपनीत धातू वितळविण्याच्या भट्ट्या असून, त्यातून दररोज मोठ्या प्रमाणात राख बाहेर पडते. ही राख केमिकलयुक्त असल्याचा दावा पक्षाने निवेदनात केला आहे. तिची योग्य विल्हेवाट न लावल्यास पर्यावरण आणि नागरिकांच्या आरोग्याला धोका निर्माण होऊ शकतो, अशी चिंता व्यक्त करण्यात आली आहे.
वाई–पाचवड रस्त्यालगत कृष्णा नदीपात्राच्या शेजारील उताराच्या जागेवर कंपनीकडून ही राख टाकण्यात आल्याचा आरोप निवेदनात करण्यात आला आहे. जोरदार वाऱ्यामुळे ही राख नदीपात्रात जाण्याची शक्यता असून, त्यामुळे नदीतील पाणी दूषित होण्याचा धोका असल्याचे पक्षाने म्हटले आहे. आधीच दुष्काळी परिस्थिती असताना जलस्रोतांचे प्रदूषण होणे गंभीर असल्याचेही निवेदनात नमूद करण्यात आले आहे.
सदर राखेची विल्हेवाट लावण्यासाठी कंपनीकडे आवश्यक प्रक्रिया व्यवस्था नसल्याचा तसेच राख टाकण्यासाठी सक्षम प्राधिकरणाची परवानगी घेतलेली नसल्याचा आरोपही पक्षाने केला आहे. प्रशासनाने या प्रकरणाची तातडीने दखल घेऊन संबंधित ठिकाणची पाहणी करावी, राख नदीपात्रापासून हटवावी आणि कंपनीकडून योग्य विल्हेवाटीची व्यवस्था होईपर्यंत कंपनी सील करावी, अशी मागणी करण्यात आली आहे.
यापूर्वी कंपनीत एका महिन्याच्या कालावधीत दोन कामगारांचा मृत्यू झाल्याच्या घटनांचाही निवेदनात उल्लेख करण्यात आला आहे. कंपनीच्या कारभाराची सखोल चौकशी करून योग्य ती कारवाई करावी, अशी मागणी पक्षाने केली आहे. प्रशासनाने तातडीने कार्यवाही न केल्यास आंदोलन छेडण्याचा तसेच राख जिल्हाधिकारी आणि प्रांताधिकारी कार्यालयात टाकण्याचा इशारा देण्यात आला आहे.
निवेदन देताना पीपल्स रिपब्लिकन पार्टीचे सातारा जिल्हा युवक अध्यक्ष अनमोल कांबळे, जिल्हा महासचिव प्रणित मोरे, वाई तालुका अध्यक्ष विजय भाऊ सातपुते, वाई शहराध्यक्ष रणवीर परदेशी, सनी वाघमारे, अमोल चव्हाण यांच्यासह पक्षाचे इतर पदाधिकारी उपस्थित होते.
