श्वान निर्बीजीकरण, लसीकरण आणि देखभालीसाठी प्रभावी यंत्रणा उभारण्याच्या दृष्टीने ABC सेंटरच्या कामकाजाची पाहणी
प्रतिनिधी :
पनवेल महानगरपालिका क्षेत्रातील भटक्या श्वानांच्या वाढत्या समस्येवर प्रभावी उपाययोजना करण्यासाठी तसेच श्वानांचे योग्य व्यवस्थापन, निर्बीजीकरण आणि लसीकरणाची सक्षम यंत्रणा उभारण्याच्या दृष्टीने पनवेल महानगरपालिकेच्या महापौरांसह नगरसेवकांनी उत्तर प्रदेशातील वाराणसी येथे अभ्यासदौरा केला. या दौऱ्यात उत्तर प्रदेश सरकार संचालित ॲनिमल बर्थ कंट्रोल (ABC) आणि डॉग केअर सेंटरला भेट देऊन तेथील कामकाजाची सविस्तर पाहणी करण्यात आली.
या अभ्यासदौऱ्यादरम्यान केंद्रात राबविण्यात येणारी भटक्या श्वानांच्या निर्बीजीकरणाची प्रक्रिया, लसीकरण, श्वानांची देखभाल आणि त्यांच्या व्यवस्थापनासाठी अवलंबण्यात येणाऱ्या विविध कार्यपद्धतींची माहिती घेण्यात आली. श्वान व्यवस्थापनासाठी आवश्यक पायाभूत सुविधा, मनुष्यबळ, नियोजन आणि प्रशासकीय यंत्रणा यांचा प्रत्यक्ष अनुभव घेणे हा या दौऱ्यामागील प्रमुख उद्देश होता.
वाराणसी येथील केंद्राच्या धर्तीवर पनवेल महानगरपालिका क्षेत्रातही अशाच प्रकारची प्रभावी यंत्रणा उभारता येईल का, याचा अभ्यास या भेटीदरम्यान करण्यात आला. नागरिकांची सुरक्षितता सुनिश्चित करण्याबरोबरच भटक्या श्वानांचे शास्त्रीय पद्धतीने व्यवस्थापन करणे आणि त्यांचे आरोग्य जपणे, या दृष्टीने या अभ्यासदौऱ्याला महत्त्व प्राप्त झाले आहे.
या अभ्यासदौऱ्यात महापौर नितीन पाटील, उपमहापौर प्रमिला पाटील, माजी सभागृह नेते तथा नगरसेवक परेश ठाकूर, स्थायी समिती सभापती बबन मुकादम, सभागृह नेते ॲड. प्रकाश बिनेदार, विरोधी पक्षनेते अरविंद म्हात्रे, चारही प्रभाग समित्यांचे सभापती रवींद्र भगत, अजय बहिरा, रवि जोशी आणि मधू पाटील यांच्यासह स्थायी समितीचे सदस्य उपस्थित होते.
वाराणसी येथील ABC सेंटरच्या पाहणीतून मिळालेली माहिती आणि अनुभव पनवेल महानगरपालिकेच्या आगामी नियोजनासाठी उपयुक्त ठरणार आहेत. या अभ्यासदौऱ्याच्या माध्यमातून पनवेल शहरात भटक्या श्वानांच्या व्यवस्थापनासाठी अधिक शास्त्रीय, नियोजनबद्ध आणि प्रभावी व्यवस्था उभारण्याच्या दृष्टीने पुढील कार्यवाही होण्याची अपेक्षा व्यक्त केली जात आहे.
