खांडबारा चार रस्त्यांजवळ इंडिका कार खड्ड्यात कोसळली; वाहनाचे मोठे नुकसान, सुरक्षा उपाययोजनांचा अभाव
खांडबारा (प्रतिनिधी) :
नंदुरबार-विसरवाडी महामार्गावर सुरू असलेल्या कामादरम्यान ठिकठिकाणी मोठमोठे खड्डे खोदून ठेवण्यात आल्याने वाहनचालकांच्या सुरक्षिततेचा प्रश्न ऐरणीवर आला आहे. या खड्ड्यांचा अंदाज न आल्याने अपघातांचा धोका वाढत असून, कामाच्या ठिकाणी आवश्यक सुरक्षा उपाययोजना केल्या जात नसल्याबद्दल वाहनचालकांकडून नाराजी व्यक्त होत आहे.
नुकताच खांडबारा चार रस्त्यांजवळ खोदलेल्या खड्ड्याचा अंदाज न आल्याने एक इंडिका कार थेट खड्ड्यात कोसळली. या अपघातात कारचे मोठ्या प्रमाणात नुकसान झाले. सुदैवाने या घटनेत कोणतीही जीवितहानी झाल्याची माहिती समोर आलेली नाही.
महामार्गावर ठिकठिकाणी मोठे खड्डे खोदून ठेवण्यात आले असताना वाहनचालकांच्या सुरक्षिततेसाठी आवश्यक खबरदारी का घेतली जात नाही, असा सवाल उपस्थित होत आहे. खड्ड्यांभोवती संरक्षक कठडे उभारणे, धोक्याचे सूचना फलक लावणे तसेच रात्रीच्या वेळी स्पष्ट दिसतील असे रिफ्लेक्टर बसविणे आवश्यक असताना याकडे दुर्लक्ष होत असल्याची तक्रार वाहनचालकांकडून केली जात आहे.
महामार्गावरील कामाच्या ठिकाणी योग्य सुरक्षा व्यवस्था नसल्यास वाहनचालकांच्या जीवाला धोका निर्माण होऊ शकतो. त्यामुळे संबंधित ठेकेदाराने तातडीने आवश्यक सुरक्षा उपाययोजना कराव्यात. तसेच जिल्हाधिकाऱ्यांनी या प्रकाराची दखल घेऊन संबंधित यंत्रणेमार्फत पाहणी करावी आणि निष्काळजीपणा आढळल्यास नियमानुसार कारवाई करावी, अशी मागणी वाहनचालकांकडून होत आहे.
अपघात झाल्यानंतरच प्रशासन जागे होणार का? असा संतप्त सवाल नागरिकांकडून उपस्थित केला जात असून, महामार्गावरील खोदलेले खड्डे तातडीने सुरक्षित करण्याची मागणी जोर धरत आहे.
