नंदुरबार–विसरवाडी महामार्गावरील वाहतूक दोन तासांपासून ठप्प; वाहनांच्या लांबच लांब रांगा, ठेकेदाराच्या कामावर पुन्हा प्रश्नचिन्ह
खांडबारा (प्रतिनिधी) :
नंदुरबार–विसरवाडी महामार्गावरील खांडबारा–श्रावणी परिसरात पवनऊर्जेसाठी वापरण्यात येणारे महाकाय पाते वाहून नेणारा अवजड ट्रक बांधकाम सुरू असलेल्या पुलाजवळील मोठ्या खड्ड्यात अडकल्याची घटना घडली. या घटनेमुळे महामार्गावरील वाहतूक गेल्या दोन तासांपासून पूर्णपणे ठप्प झाली असून, रस्त्याच्या दोन्ही बाजूंना वाहनांच्या लांबच लांब रांगा लागल्या आहेत. त्यामुळे प्रवासी, वाहनचालक आणि स्थानिक नागरिकांना मोठ्या मनस्तापाला सामोरे जावे लागत आहे.
महामार्गाच्या कामातील निष्काळजीपणा पुन्हा ऐरणीवर!
नंदुरबार–विसरवाडी महामार्गाचे काम सध्या विविध ठिकाणी सुरू आहे. पुलांच्या बांधकामासाठी ठिकठिकाणी मोठमोठे खड्डे खोदण्यात आले आहेत. मात्र, या कामाच्या ठिकाणी वाहनचालकांच्या सुरक्षिततेसाठी पुरेशा उपाययोजना केल्या जात आहेत का, असा प्रश्न या घटनेमुळे उपस्थित झाला आहे.
यापूर्वी खांडबारा चार रस्त्यांजवळ खोदलेल्या खड्ड्यात इंडिका कार कोसळून अपघात झाला होता. त्या घटनेनंतर आता महाकाय पाते वाहून नेणारा अवजड ट्रक खड्ड्यात अडकल्याने महामार्गावरील वाहतूक नियोजन आणि सुरक्षिततेचा प्रश्न पुन्हा चर्चेत आला आहे.
पर्यायी मार्ग आणि सुरक्षिततेचे नियोजन कुठे?
महामार्गाचे काम सुरू असताना अवजड वाहनांच्या वाहतुकीचे योग्य नियोजन करण्यात आले होते का? वाहनांसाठी सुरक्षित पर्यायी मार्ग उपलब्ध करून देण्यात आला होता का? बांधकाम सुरू असलेल्या ठिकाणी सूचना फलक, बॅरिकेड्स आणि आवश्यक सुरक्षा व्यवस्था उभारण्यात आली होती का? असे अनेक प्रश्न या घटनेच्या निमित्ताने उपस्थित होत आहेत.
आणखी किती अडचणींनंतर प्रशासन जागे होणार?
महामार्गावरील सुरू असलेल्या कामामुळे वाहनचालकांना वारंवार अडचणींचा सामना करावा लागत असल्याच्या तक्रारी आहेत. वाहतूक ठप्प होणे, वाहनांचे नुकसान होण्याचा धोका आणि प्रवाशांचा वेळ वाया जाणे यामुळे नागरिकांमध्ये नाराजी व्यक्त होत आहे.
संबंधित ठेकेदाराच्या कामाची चौकशी करून महामार्ग प्रशासनाने तातडीने आवश्यक सुरक्षा उपाययोजना कराव्यात. बांधकामस्थळी योग्य दिशादर्शक सूचना फलक व बॅरिकेड्स लावावेत तसेच वाहतुकीसाठी सुरक्षित पर्यायी व्यवस्था करावी, अशी मागणी नागरिकांकडून होत आहे.
आता तरी संबंधित विभाग आणि प्रशासन या गंभीर समस्येकडे लक्ष देणार का, की आणखी एखाद्या अपघाताची वाट पाहणार, असा संतप्त सवाल या घटनेनंतर नागरिकांकडून उपस्थित केला जात आहे.
