ऑलिम्पिया ट्रस्ट आणि पर्सिस्टंट फाउंडेशनचा संयुक्त उपक्रम; प्रधानमंत्री टीबी मुक्त भारत अभियानाला बळ
प्रतिनिधी : शिरूर : प्रधानमंत्री टीबी मुक्त भारत अभियानांतर्गत ऑलिम्पिया ट्रस्ट, पुणे आणि पर्सिस्टंट फाउंडेशन यांच्या संयुक्त विद्यमाने शिरूर येथील ग्रामीण रुग्णालयात क्षयरुग्णांसाठी पोषण आहार किट वाटप कार्यक्रमाचे आयोजन करण्यात आले. पर्सिस्टंट फाउंडेशनच्या आर्थिक सहकार्यातून ३०० क्षयरुग्णांसाठी पोषण आहार किट उपलब्ध करून देण्यात आले आहेत.
क्षयरोगावरील उपचार सुरू असताना रुग्णांना सकस व पौष्टिक आहार मिळावा, त्यांची रोगप्रतिकारशक्ती सुधारण्यास मदत व्हावी आणि उपचारांचा निर्धारित कालावधी नियमितपणे पूर्ण करण्यासाठी आवश्यक पोषण सहाय्य मिळावे, हा या उपक्रमाचा मुख्य उद्देश आहे. औषधोपचारांसोबत योग्य आहार आणि सामाजिक आधार मिळाल्यास रुग्णांना उपचार पूर्ण करण्यासाठी मदत होते.
ऑलिम्पिया ट्रस्टने महाराष्ट्र शासनाच्या सार्वजनिक आरोग्य विभागासोबत सामंजस्य करार (MoU) केला असून, त्याअंतर्गत प्रधानमंत्री टीबी मुक्त भारत अभियानासाठी पोषण आहार सहाय्य उपक्रम राबविण्यात येत आहे. या उपक्रमाला पर्सिस्टंट फाउंडेशनचे आर्थिक सहकार्य लाभले आहे.
यावेळी ऑलिम्पिया ट्रस्टचे अध्यक्ष नरेंद्र पाटणकर म्हणाले, “क्षयरोगमुक्त भारताचे स्वप्न साकार करण्यासाठी केवळ औषधोपचार पुरेसे नसून रुग्णांना योग्य पोषण आहार आणि सामाजिक आधार मिळणेही अत्यंत आवश्यक आहे. पर्सिस्टंट फाउंडेशनसारख्या सामाजिकदृष्ट्या जबाबदार संस्थांच्या सहकार्यामुळे गरजू रुग्णांपर्यंत मदत पोहोचविणे शक्य होत आहे. आगामी काळात अधिकाधिक कॉर्पोरेट संस्था आणि सामाजिक घटकांना या अभियानाशी जोडण्याचा आमचा प्रयत्न राहील.”
शिरूरचे तालुका आरोग्य अधिकारी डॉ. पांचाळ राठोड यांनी क्षयरोग निर्मूलनासाठी नियमित औषधोपचार आणि सकस आहाराचे महत्त्व अधोरेखित केले. ते म्हणाले, “क्षयरोग हा पूर्णपणे बरा होऊ शकणारा आजार आहे. त्यासाठी रुग्णांनी औषधोपचार नियमितपणे पूर्ण करणे, सकस आहार घेणे आणि आरोग्य विभागाच्या मार्गदर्शनाचे पालन करणे आवश्यक आहे. गरजू रुग्णांना उपचारादरम्यान पोषण आहारासाठी मिळणारे सहाय्य त्यांच्या आरोग्य सुधारण्यासाठी उपयुक्त ठरते. अशा सामाजिक उपक्रमांमुळे शासनाच्या क्षयरोग निर्मूलन मोहिमेला बळ मिळते.”
या कार्यक्रमास शिरूर नगरपरिषदेचे नगरसेवक दादाभाऊ लोखंडे, ऑलिम्पिया ट्रस्टचे अध्यक्ष नरेंद्र पाटणकर, उपाध्यक्षा दीपाली सावंत-भोसले, जिल्हा क्षयरोग केंद्राच्या जिल्हा कार्यक्रम समन्वयक (DPC) डॉ. अंजली गायकवाड आणि तालुका आरोग्य अधिकारी डॉ. पांचाळ राठोड यांची प्रमुख उपस्थिती होती. तसेच ग्रामीण रुग्णालयातील वैद्यकीय अधिकारी, आरोग्य कर्मचारी आणि लाभार्थी रुग्ण उपस्थित होते.
क्षयरोग निर्मूलनासाठी शासन, स्वयंसेवी संस्था आणि कॉर्पोरेट क्षेत्र यांच्यातील समन्वय महत्त्वाचा आहे. अशा संयुक्त उपक्रमांमुळे रुग्णांना उपचारादरम्यान आवश्यक पोषण सहाय्य मिळण्यास मदत होते. ‘सकस पोषण, सक्षम रुग्ण आणि क्षयरोगमुक्त भारत’ हा संदेश या उपक्रमातून देण्यात आला.
